Нырысетӥ Ашальчи лыдӟонъёсын сётӥзы Ашальчи Оки нимо йӧскалык премиез

Нырысетӥ Ашальчи лыдӟонъёсты усьтӥзы «Удмурт нылкышно кенеш» огазеяськонлэн кивалтӥсез Надежда Степанова но Можга педколледжлэн кивалтӥсез Николай Пискунов.

Надежда Степанова пусйиз, таяз арын нимысьтыз ужпум пуктэмын вал — Ашальчи Окилэн творчествоеныз но улон сюресэныз гурт нылкышноосты тодматыны. Можга педколледже но ӧтемын вал удмурт гуртъёсысь кылбурась нылкышноос. Ашальчи Окилэсь творчествозэ тодонъя «Тон юад мынэсьтым…» ӵошатсконэ пыриськизы Можга ёросысь кык командаос – Пазял гуртысь «Чыртывесь» но Вуж Какси гуртысь «Удмурт нылкышноос». Тодон — валанзэс эскериз жюри — Ашальчи Окилэн премиезлэн лауреатъёсыз , тодмо кылбурчиос Любовь Тихонова , Галина Романова но Алнаш ёрос Нылкышно кенешлэн кивалтӥсез Валентина Иванова. Нырысетӥ интые потӥзы «Чыртывесьёс».

Та ужрадын ик Удмурт нылкышно кенеш тужгес адӟем карымон анайёсты «Кылбурась анай сюлэм» нимын пусйиз. Гожъяськон удысэ кыстӥськись нылкышноос понна радъямын вал«Кылбуран кунокуаос». Можга педколледжысь дышетскисьёс но Можгакарысь 9-тӥ номеро нылпи садэ ветлӥсь покчиос возматӥзы Ашальчи Окилэн кылбуръёсызъя дасям «Ма сярысь кырӟа удмурт нылкышно» композиция.

Удрадлэн кыкети люкетаз Ашальчи Оки нимо йӧскалык премиез сӥё-дано сётон радъяськиз., кытчы пыриськизы «Удмурт Кенеш» огазеяськонлэн исполкомчиосыз но. Выль лауреатъёсты — Кияса ёросысь Вуж Салья гуртысь «Нылкышно шуд» клублэсь кивалтӥсьсэ Марина Моряковаез но Удмурт Элькунысь Нылкышно кенешлэсь тӧрозэ Надежда Степановаез ӟечкылазы Вань удмуртъёслэн «Удмурт Кенеш» огазеяськонзылэн кивалтӥсез Татьяна Ишматова, «Удмурт Кенеш» огазеяськонлэн Дано Президентэз Валентин Тубылов но Россиысь Кун Думалэн депутатэз Николай Мксалимов.

Йылпумъяськизы Нырысетӥ Ашальчи лыдӟонъёс Трокай Борисовлы сӥзем стеллаез усьтонэн.