Нылпиослы удмурт эктонъя но киужъёсъя мастер-классъёс ортчытозы Ижкарын Гербер шулдыръяськонын

Удмурт кылэз тодӥсь пиналъёс понна дышетонъёс 12 час 30 минутысен «Удмурт Кенеш» огазеяськонлэн азбараз радъяськозы.

«Ӵектослэн ӧнерчиосыз соос понна пӧртэм мастер-классъёс дасязы. Горд сюен ужась элькунысь тодмо ӧнерчи Вера Степанова пиналъёсты удмурт мушъёсты лэсьтыны дышетоз. К. Герд нимо прогимназиысь визьнодась Елена Фролова удмурт калык шудонъёсын шудыны ӧте. Калык эктонъя «Чебеляй» студиысь дышетӥсь Елизавета Бехтерева удмурт эктонъёсъя мастер-класс дасяз. Удмурт кылын чебер вераськыны дышетоз ӵектослэн ӧнерчиез Любовь Михайлова», — вера Ольга Бикузина, «Нуныкай» центрлэн координаторез.

Тодэ вайытом, кык кылолыко нылпиос понна «Нуныкай» центр «Удмурт Кенеш» огазеяськонлэн «Билингва. О практиках формирования двуязычия в современной городской среде» ӵектосэз улсын ужа. Кылем арын ӵектос Азьмуртлэн грантъёсъя фондэзлэн вожвылъяськоназ вормисез потӥз.

Ватсалом, Ижкарысь Кызьпу арамаын Гербер шулдыръяськон 12-тӥ инвожое 12 часын кутскоз. Со улсын пӧртэм площадкаос ужалозы. Кылсярысь, Удмуртиысь йӧскалык лыдӟетъюрт элькунысь тодмо гожъясьёсын но кылбурчиосын пумиськонъёс но автограф-сессиос радъялоз.

16-тӥ инвожое Ува ёросысь Пекшур гурт вӧзын элькун Гербер ортчоз.

https://udmurt.media/udm/news/kultura-i-turizm/37467/