Нылпиослы «Ми — удмуртъёс» программаез улонэ пыӵато Якшур-Бӧдьяын

«Тӧдьы юсь» огазеяськонэ 13 мурт пыриське. «Ми — удмуртъёс» программаез быдэстон ужъя 7-8 адями ветлэ. Программа быдэсак пиналъёслы тупатэмын. Со бордын 2012-2013 аръёсы ужаны кутскизы ини. Ужрадъёсты нылпи садъёсын яке покчи классъем школаосын толэзьлы быдэ яке кык толэзьлы огпол ортчытъяло.

«Та программаен ми пиналъёсты тодматӥськомы удмурт сям-йылолъёсын, кыӵе шулдыръяськонъёссы вал удмуртъёслэн но али кыӵе луо. Таяз программаын ми мадиськомы Быдӟымнунал сярысь но Нуны сюан сярысь. Вераськом удмурт калык туж кырӟась шуыса. Корка ӝуто – кырӟало, чечы окто – кырӟало, пӧйшураны мыно – кырӟало. Ӟеч мылкыд ке – шулдыр кырӟанъёс, куректонзы вань ке – мӧзмыт кырӟанъёс», — вера  Татьяна Селивёрстова, этнофутуризмъя «Тӧдьы юсь» огазеяськонлэн кивалтӥсез.

Пиналъёсты удмурт крезьгуро арбериосын но тодмато. Со сяна удмурт шудонъёс ортчыто, кылсярысь, «Ки ултӥ потыса шудон-эктон», «Чабкыса шудон-эктон», «Италмас».

21-тӥ куартолэзе та программаен Пушкари но Мукши гуртъёсысь пиналъёсты тодматӥзы. Татьяна Селивёрстовалэн верамезъя, программазы быдэсак ӟуч кылын мынэ.

«Пиналъёс тросэз уг верасько ини удмурт сямен. Кытын ке Сюровайын гинэ кӧня ке валало на, Якшурын куд-огез быгато на, нош верасько ӟуч кылын гинэ. Но пиналъёслы туж яра. Пиналъёслы но, бадӟымъёсызлы но. Верало, лыктэ на эшшо шуыса. Пиналъёс туж учко, кылзо, уг шумето», — шуэ Татьяна Селивёрстова.

Татьяна Селивёрстовалэн верамезъя, та программаез азинтон бордын азьланяз но ужалозы. Малы ке шуоно соосты возьмало: кызьы выль интыосын,озьы ик азьвыл вуылэмъёсаз но, одӥгъёсыз пиналъёс будо, мукетъёсыз вуо. Вуоно пумиськонъёсты выль дышетскон ар кутскыса гинэ мытозы.

https://udmurt.media/udm/news/obrazovanie-i-nauka/56542/