Нылпиос «ТылГож» марафонэ пыриськизы
Удмурт кыллэн нуналызлы сӥзьыса Ижкарысь азьветлӥсь Наталья Клабукова пиналъёс понна #ТылГож онлайн-марафон ортчытӥз.
— Туала вакытэ нылпиос шугъясько малпанъёссэс шонер вераны, — вераз Наталья. — Соин Кузебай Герд нимо гимназиысь «ТылКыл» студиысь пиналъёсын малпамы марафон куспын нылпиослы удмуртлык сярысь 5 задание сётыны. Нырысь нылпиос веразы, маин соос тунсыкъясько, кыӵе быгатонлыкъёссы вань. Берло веразы, кыӵе удмурт кылъёс соосты паймыто, кылдытъязы мемъёс, малпаськизы удмуртлыклэн азьланез сярысь, лэсьтӥзы Удмурт кыллэн нуналэныз ӟечкылан видеосуредъёс.
Марафонэ пыриськизы 8-17 аресъем 30 пиналъёс, пӧлазы ӟучъёс но вал. Ижкар, Грак, Алнаш, Сьӧлта, Эгра, Пичи Пурга ёросъёс, Татарстанысь Кукмор, Агрыз ёросъёс, Америкаысь Флорида штат — марафон гуртъёсты, ёросъёсты, элькунъёсты но кунъёсты герӟаз.
Нылпиос ужъёссэс «ВКонтакте» вотэс бамъёсазы поттылӥзы. Оглом 100 пала пост, 20 пала видеоролик, 60 пала мем пӧрмиз.