Нылпиос понна лулчеберетъя «Зарни шыкыс» фестиваль ортчиз Глаз ёросын
Сомында калык люкаськиз, залын ваньмызлы пукон но ӧз шедьы, кин ке коридоре интыяськиз. Нош жюриын кыӵе адямиос! «Удмурт кенеш» огазеяськонлэн Глазовысь ёзэтэзлэн кивалтӥсез Инесса Рябова, Удмурт Элькунысь калык артистка Надежда Уткина, «Иднакар» музейысь археологияя ёзэтэн кивалтӥсь Александр Дёмин.
Фестиваль пӧртэм ужпумъёсты быдэстэ: нылпиос калык культураен тодматско, эскерон уж нуыны но асьсэдыз сцена вылын возьыны дышетско. Кызьы вера Куреггурт школалэн директорез Александра Туктарева, вань люкам материал покчи шаерлэн историеныз герӟаськемын. Со сяна, ужрадэ нылпиос мумы-бубыоссэс, песянай-песятайёссэс кыско. Тани школае лыктэмъёсты пумитаз Самкиысь «На завалинке» коллектив, нылпиосын ӵош сцена вылэ потазы Коротайысь «Гербер» ансамбль но Кожильысь «Дыдыксин» коллектив. Со ик луэ ужрадлэн валтӥсез малпанэз – пиналъёс но бадӟымъёс артэ.
Ужрадлы нылпиос рос-прос дасяськиллям, бадӟым уж нуиллям. Азьло эскерон уженызы тодматӥзы, нош собере оглюкетсэ сцена вылын возьматӥзы. Пониноос «Куно пумитан», Дондыкарысь нылпиос – «Пинал пыртон», Пыбья школаысь нылъёс но пиос – «Ошпи сиён», Кожиль школаысь дышетскисьёс — «Вӧйдыр» удмурт йылолъёсты дасяллям, Куреггуртысь пиналъёс – «Марусямы етӥнзэ кизе ни» постановка возьматӥзы, Люм школаысь дышетскисьёс вожоосын тодматӥзы.