«Нуныкай» выль сезонзэ усьтэ 

Чакламын: кылэз волятонъя но крузьгуръя дышетсконъёс, шудонъёс. «Нуныкайысь» ӧнерчиос матысь арлы чаклам ужан радлыкен тодматозы.

Ижкарын кыккылъем нылпиос понна «Нуныкай» центр кылем арын усьтӥськиз. Нырысетӥ пумиськонзы куарусёнэ ортчиз. Занятиос 2-сен 9 аресозь удмурт пиналъёс но соослэн анай-атайёссылы чакламын.

Ӵектосэз кылдытӥсьёслэн верамзыя, каръёсын улӥсь удмурт семьяослы анай кылзэс утён секыт сётӥське. Пиналъёс понна пумиськонъёс, кытын соос быгато ваче тодматскыса удмурт кылын вераськыны, туж ӧжыт. Югдурез тупатон вылысь «Удмурт Кенеш» огазеяськон «Нуныкай» площадка кылдытӥз. Ужрад улсын нылпиос пумиськыны, тодматскыны, ваньмон дырзэс пайдаен но удмурт кылын вераськыса ортчытыны быгато.