Николай Вахрушев нимо йӧскалык премия кылдоз Балезино ёросын

Таӵе кичӧлтонэн потӥз «Удмурт Кенеш» огазеяськонлэн Балезино ёросысь ёзэтэз, решени кутэмын йӧскалык ужпумъёсъя координаци кенешын. Со сярысь ивортэмын «Удмурт Кенеш»-лэн вотэс бамаз.

Али дыре положение бордын уж кутскемын, кенешчиос малпало сое куарусён толэзёзь вуттыны. Туннэ нуналын вераны луэ ини, премия кык арлы одӥг пол сётӥськоз шуыса, нош нырысетӥ лауреатъёс тодмо луозы вуоно арын Элькунмылэн нуналэз азьын.

Николай Дмитриевич Вахрушев — Удмуртиысь калык артист. Вордӥськиз 1938-тӥ арын Балезино ёросысь Ӟатчашур гуртын. Аслаз баритон куараеныз со шаерысьтымы но, Россиысь но учкисьёсты паймытыны быгатӥз. Соин ик сое калыкын уйпал уӵы шуылӥзы.