«Мынам вордӥськем шаере: инкуазь, лулчеберет, калык» огъяросси вожвылъяськонлэн улосвыл люкетэз ортчиз Удмуртиын
Вожвылъяськонэ пыриськон понна Балезино, Вавож, Вотка, Грак, Дэбес, Дэри, Эгра, Камбарка, Кез, Кизнер, Пичи Пурга, Сарапул, Сьӧлта, Сюмси, Ува, Якшур-Бӧдья, Яр ёросъёсысь но Вотка но Глаз каръёсысь 58 дышетскисьёслэн ужъёссы вуизы. Эскерисьёс соос пӧлысь 35-сэ бырйизы но Удмуртиысь 12 ёросъёсысь но кык каръёсысь 6-11 классъёсын 42 дышетскисьёсты ӧтчазы. Вормисьёс но призёръёс пӧлы Вотка, Дэри, Эгра, Кизнер, Пичи Пурга, Сьӧлта, Ува ёросъёсысь пиналъёс потӥзы.
Эскерон ужъёсты Удмурт кун университетысь, Йӧскалык лыдӟетъюртысь, Нылпиослы ватсаса тодон-валан сётонъя элькун центрысь ӧнерчиос эскеризы.
Вормисьёсты но призёръёсты Удмуртиысь дышетонъя но тодосъя министерстволэн дипломъёсыныз пусйизы. Вань пыриськисьёслы сертификатъёс но Удмурт кун университетлэсь синпель кузьымъёссэ сётӥзы.
Азьланяз та вожвылъяськонын вормисьёслы Удмурт кун университетысь нимысьтыз ӧръёсъя дышетскыны пырыкузы ватсаса баллъёс сётыны чаклало.
туспуктэмъёс — Удмурт Кун университет