«Мынам Удмуртие» нылпиос понна «Покчи кылчи» передача возьматэ
— Туннэ 5 программалы сценариймы дась, — съёмкаос вискын вера О. Ардашева. — Та передача мукетъёсызлэсь висъяське, угось урок выллем ортче. Малы озьы? Туннэ анай-атайёслэсь ӵем кылӥсько: нылпимы удмурт кылэз вала, но вераськыны уг быгаты. Собере, тросэз туала пиналъёс, ульчаысь удмурт сямен вераськисьёсты кылыса, паймо, юало: соос англи кылын верасько-а?! Таӵе учыръёс шергес мед луозы шуыса, урокъёс выллем передача кылдытоно кариськимы. Шаерамы будӥсь котькудӥз пинал мед тодоз, макем чебер чузъяське удмурт кыл!
Передачаез нуо Малыок но Бӧтьырок, соослы юрттӥсько пиналъёс. Нылпиос татчы шедемзылэсь азьвыл вожвылъяськонэ пырисько. Кин камера азьын ассэ йӧно возе, удмурт кылэз дышетыны мылкыд каре, со ик чагыр экранэ шеде.
Та дырлы 3 передача гожтэмын ини. Сӥземын соос тодматсконлы, тулыслы но туслы. Матысь дыре йылпумъямын луозы семьялы но дӥськутлы сӥземъёсыз. Котькуд урокын ӟучо-удмурто нылпиос шудон пыр 5-7 выль кылэз тодозы но йыразы кельтозы. Та уже пырисько анай-атайёс но.
Съёмкаос ортчо вӧл-вӧл павильонын. Операторъёс шуо: 1 передачаез гожтыны ог 2 час выриськомы. Отысь тужгес усто кадръёсты 5-7 минутъем «Покчи кылчие» тэрыто.
Мунё театрысь артист Евгений Перевозчиков шудэ Бӧтьырокез. Съёмкаослэсь азьвыл мунёезлэсь йырсизэ, дэремзэ лач-лач тупатъяса, шуэ:
— Камера азьын нылпиосын ужаны туж кельше. Но куараме ялан чаклано луэ. Театрын сцена вылын микрофонтэк шудӥськомы бере, дышиськем ини бадӟым куараен вераськыны. Телевидениын озьы уг яра вылэм — куара шуккиське.
Кыкетӥ передачае пыриськыны шуд усиз Ижысь 112 номеро нылпи садысь 5 аресъем Стефания Нагибиналы но Даша Михайловалы. Нылъёс камералэсь чик уг кышкало, доразы сямен павильонын бызьылыса-тэтчаса шудо.
— Ма, ми 4-тӥзэ ини татчы съёмкаосы лыктӥмы, — вера Стефаниялэн атаез Антон Нагибин. — Телевидение нылы дораз сямен пыре. Будӥ ке, журналист луо, шуэ. Ачим но кузпалы — ӟучъёс, но выжымы удмурт. Туж потэ, нылмы удмурт кылэз мед тодоз шуыса. Со понна садикмы ӟеч тырше, видеоурокъёс но, малпасько, емышсэс сётозы.