Музей вылтуслэн вунэтэм дэлетэз

«Лудорвай» музейлэн “Музей вылтуслэн вунэтэм дэлетэз” нимо проектэз улсын Лудорвай школае вуриськон машинаос вуизы, кечато басмаос басьтӥзы. Ӝоген нылъёс вуриськон борды басьтӥськозы. Нош удмурт дэрем сярысь нырысь-валысь тодон-валанъёс басьтон понна соос юри Пичи Пургае Татьяна Москвина модельер доры ветлӥзы.

Палэнэ уз кыле пиос но. Школа мастерскойын соос пулэсь арбериос лэсьтылозы. Али но пияшъёс котьма борды басьтӥсько – пуньыос но волыны, ӟусъёс но лэсьтыны быгато.

«Лудорвай» музейын ужасьёс школае юрттэт курыса ӵем вазиськылоно луо. Школаын дышетскисьёс нырысетӥ юрттӥсьёс но, учкисьёс но. Проект улсын нылпиосты экскурсоводлы но дышетозы. Гужем уката трос туристъёс лыкто. Музейын ужасьёс ваньмаз уг вуттӥсько.

Вера музейлэн кивалтӥсез Татьяна Шкляева: «Ужӵектосмы улонэ пыӵаз ке, Лудорвай школаысь нылъёс асьсэ вурем дӥськутэн «Лудорвай» музейын учкись-чаклась, экскурсовод  луыса ужаны быгатозы. Нош пиослы кузьмъёсын лавкаямы «Плотницкая мастерская» сэрег усьтомы. Отын соос асьсэлэсь арбериоссэс вузаны быгатозы».

Проектлэн мукетыз ужпумез гуртлэн чебертиськеменыз герӟаськемын. Гужем ини Лудорвайын 3 бадӟымесь стендъёс кылдозы. Отын возьматэмын луоз гуртлэн историез. Нош со туж узыр.

http://www.myudm.ru/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий