Мунё бергаз Учалан

    Мунё бергаз учалан 1

    Ужрад мотоблокъёслэн аспӧртэм парадзы бордысен кутскиз. Озьы котькуд ульча конкурсэ аслэсьтыз чебермам мотоблоксэ поттӥз.

    — Гуртамы Выль шулдыръяськонэз арлы быдэ ортчытӥськом, — пусйиз Учаысь культурая юртлэн кивалтӥсез Татьяна Мокеева. — Бадӟым бакча сиёнлы, тунсыко бакча сульдэрлы ӵошатсконъёс но котьку радъяськомы. Со сяна, туэ ар — театрлэн арез. Соин котькуд ульча пичи спектакль дасяз. Туж тунсыко пӧрмытӥзы.

    Пусйыны кулэ, Пичи Пурга ёрослы 90 ар тырмонлы сӥзьыса, туэ быдэс ар ӵоже ни ёросын «Пурга берга» фестиваль ортче. Ваньмыз сямен муниципал кылдытэтъёс кыӵе ке яркыт ужрад ортчыто. Та ужрадъёслэн пуссы — чебер удмурт мунё. Та мунё ӵапак Ильинск гуртэ вуэмын вал. Нош Выль шулдыръяськон дыръя ильинскъёс мунёез Бобья-Уча гуртлы сётӥзы.

    — Фестивальлэн пусэз туннэ нуналлы ортчиз ини ёросысьтымы ваньмыз сямен муниципал кылдытэтъёс пыр, — пусйиз Пичи Пурга ёрос администрациысь культурая ёзэн кивалтӥсь Надежда Степанова. — Кылизы на Бобья-Уча гурт но Пичи Пурга черкогурт. Ар быртозь, мунё отчы но вуылоз. Озьы Бобья-Учалан ортчоз «Тылобурдо» фестиваль, нош Пичи Пургалан — картошкалы сӥзем бадӟым ужрад.

    Учаослэн Выль шулдыръяськонзы йылпумъяськиз, выль ӝук, шыд сиыса, турынъёсын чай юыса, пӧртэм удмурт пыжиськемъёсты веръяса, ог-оген кенешыса.

    https://udmdunne.ru/