Можгын ортчиз шаертодонъя но фольклоръя «Воршуд» фестиваль

Вера Можгаысь Нылпи творчествоя юртысь ужан амалъёсъя ёзэтэн кивалтӥсь, ужрадэз огез радъясь Надежда Коробкина:

«Воршуд» фестивальмы 90-тӥ аръёсысен ортче ини. Арысь аре со малы ке но сӥземын луэ: удмуртъёслэн, финн-угор калыкъёслэн сям-йылолъёссылы, удмурт шудонъёслы. Туэ ми творчествоез но визьбурлыкез герӟаны малпамы».

Фестивальлэн нырысетӥ люкетаз пиналъёс визиткаоссэс возьматӥзы. Отын соос творчество пыр шаертодон бордын тыршемзы, фольклорен тунсыкъяськемзы сярысь веразы. Куд-ог школаосын музейёссы вань, отын тунсыко адямиосын пумиськылонъёссэс возьматӥзы. 

«Нылпиос пӧртэмесь вал. Соос карын будо ке но, удмурт кылын вераськыны быгато, валало. Шугъяськисьёсыныз кивалтӥсьёссы ужало. Визиткаоссэс ваньзы ик удмурт кылын возьматӥзы», — пусйиз Надежда Коробкина. 

Визьсынан люкетэз 4 блоклы люкемын вал: «Удмуртилэн историез», «Удмурт калыклэн сямъёсыз но йылолъёсыз», «Удмуртилэн литературая узырлыкез» но «Удмуртилэн крезьгур лулчеберетэз». Визьбурлыко шудонэ быдэн 8 адямиен 8 команда пыриськиз. 

«Пиналъёс телефонэн но мукет со выллем арбериосын медаз выре шуыса, котькуд команда вӧзы ми мукет командалэсь кивалтӥсьсэ юнматӥмы. Пиналъёслы уж сётӥськиз. Юанъёс пӧлын вал Пугачёвлэн урдскемез сярысь юан, ку, кин кивалтон вакытэ Удмуртия Россие пыриз, кыӵе арын Вотской автоном улосвыл кылдытэмын юан но. Экран вылын яке валэктонъёс, яке юрттӥсь суредъёс потазы. Озьы ик вал видео сузьетэн юанъёс. Кылсярысь, ми возьматӥм «Нуны сюанлэсь» люкетсэ. Соос тодыны кулэ вал, кыӵе сям-йылол отын возьматэмын. Собере ми ву карнан, кышет, манетъёс но удмурт ӵушкон поттам. Соос вераны кулэ вал, кыӵе йылолъёсын со арбериос кутӥськыны быгато. Крезьгур лулчеберетъя верано ке, ми крезьгур люкетъёсты кылзыны сётӥм. Литературалы сӥзем блокын вераны кулэ вал, кин со Ашальчи Оки. Собере «Пелагея и белый бульдог» киноысь люкетэз возьматӥм. Отын Вуж Мултан ужлы укшась учыр эскериськиз. Пиналъёс вераны кулэ вал, кыӵе удмурт произведениысь учырлы со укша. «Удмурт Кенеш» огазеяськонлы туэ 25 ар тырме, соин ик со сярысь но юанъёсты пыртӥм», — валэктӥз Надежда Коробкина.

Творчествоя но визьбурлыкъя турнир «Воршуд» фестиваль улсын туэ нырысьсэ ортчиз. Радъясьлэн верамезъя, нылпиослы таӵе амал туж кельшиз. «Соин ик ми малпаськом азьланяз но та амалэн ик ужаны. Шутэтскон ужрадъёс туж трос, нош таӵеосыз трос ик ӧвӧл», — йылпумъяз Надежда Коробкина.