Можгаысь Мария Гроздова — «Элькуновидение» улосвылкуспо конкурслэн 2-тӥ люкетэзлэн вормисез
«Элькуновидение» вожвылъяськонэз усьтӥзы кылем арын конкурслэн вормисьёсыз Андрей Корнилов но Иван Котельников. Соос бӧрсьы огзэс огзы вошъяса асьсэлэсь быгатонлыкъёссэс возьматизы вожвылъяськонэ пыриськисьёс. Жюрилэн ёзчиосыз азе ужпум пуктэмын — кырӟаны, сцена вылын асьсэдыз возьыны быгатэмзэс сяна, кырӟанъёслэсь кылъёссэ, крезьгурзэ эскерыны.
Вера «Элькуновидение» конкурслэн жюриезлэн ёзчиез Вера Пантелеева: «Кылзӥсь адямилы, егитъёслы туннэ кулэ одиг ласянь задор мылкыдын, яратон мылкыдын пыӵам кырӟанъес, но мукет ласянь соос мед луозы туала вакытлы тупасесь. Сыӵеоссэ 20 кырӟанъес пӧлысь куиньзэ ньыльзэ пусйыны луэ».
Удмурт кылын башкир сямен кырӟазы тупал удмуртъёс – Башкортостанысь лыктэм куноос. Туэ 5-тӥез «Элькуновидение» нырысьсэ улосвылкуспо конкурс луиз. Куноос вормисьёс пӧлы пыризы.
Нош «Элькуновиденилэн» 2-тӥ люкетэзлэн вормисез луиз Можга ерос. Мария Гроздова быдэстӥз улосчиосызлэсь Мария Мамонтовалэсь но Влад Зверевлэсь "Кизили" кырӟанзэс.
«Пӧртэм конкурсъёсы пыриськылэме вань, но удмуртаз — нырысьсэ, — шуэ Мария. Та вормон мон понна туж шумпотымон но дуно луэ».
Мария Гроздова вожвылъяськоз на «Элькуновиденилэн» 3-тӥ люкетаз 4-тӥ шуркынмонэ «Мынам Удмуртие» телеканаллэн меӵак эфираз СМС пыр яке «Мынам Удмуртилэн» сайтаз куаразэс сётыса. Соку тодмо луоз конкурслэн зэмос вормисезлэн нимыз.