Можга ёросын чеберайёсты бырйизы

Ужрад форум бордысен кутскиз. Дышетскыны нылкышноос гинэ ӧвӧл, пиосмуртъёс но мылкыд каризы. Форуме люкаськемъёсын стилист, блогер, ужбергатонъя тренер, психолог, астролог пумиськизы.

Спикеръёсты учкисьёс мыло-кыдо пумитазы. Котькудӥзлы юанъёс сётъязы, телефон номеръёссэс курылӥзы. Шӧдӥське, гуртъёсын таӵе ивор-тодонъёс уггес тырмо, калыклы трос выльзэ тодыны но вылезлы дышетскыны туж тунсыко вылэм.

Форум бере «Чеберай 2020» элькун вожвылъяськонэ пыриськисьёсты быръён ортчиз.

«Кызьы шуо, дуннез улӟытоз, валтоз но утёз чеберлык. Чеберлык борды котьку но лякиське яратон, капчи мылкыд, ог-огдэ валан но ог-огдэ гажан. Вожвылъяськонэ пыриськись нылъёслы вераме потэ, луоды-а тӥ валтӥсь чеберай, уд-а, туннэ тӥ котькудды вормись луиды ни, малы ке шуоно тӥ дӥсьтӥды, тӥ дасяськиды, тӥ лыктӥды», — Удмурт Кенеш» огазеяськонлэн Тӧроез Татьяна Ишматова.

Вожвылъяськонэ10 нылъёс но апай-кенакъёс пыриськизы. Соос асэнызы тодматӥзы, визьсынанын удмурт лулчеберетэз но историез тодэмзэс эскеризы, озьы ик кибашлы луэмзэс возьматӥзы.

Вожвылъяськонлэсь вань люкетъёссэ ортчыса, «Чеберай 2020» быръён люкетаз 18-35 арлыдъя категориын вормиз Анна Безенцева (Поршур черкогурт), 35-55 арлыдъя категириын устоез луиз Елена Тимофеева (Люга станция), нош 55 но солэсь бадӟым арлыдъя категориын жюриысь ёзчиос бырйизы Надежда Воронцоваез (Бадӟым Кибья черкогурт). Озьыен, вормись чеберайёс табере вожвылъяськонлэн кыкетӥ люкетаз, интернет пыр куара сётонэ, пыриськозы.