Можга ёрослэн литератураезлы сӥзем нуналъёсты ворсан ужрад 20-тӥ толсуре ортчоз

Ужрадын ортчем арлы йылпумъянъёс лэсьтозы, лыдӟисьёслэн «Можгалэн жильыртӥсь чуръёсыз» элькун вожвылъяськоназы вормисьёсты пусъёзы. Сое Йӧскалык лыдӟетъюрт Удмуртиысь Лулчеберетъя но туризмъя министерство но элькунысь Театрын ужасьёслэн огазеяськонзы юрттэмен ортчытӥз.

Со нуналэ ик быдэ вуымтэос понна устозэ чеберлыко произведениез быръёнъя калыккуспо конкурслэн II степенё лауреатэныз Ирина Богатырёваен пумиськон ортчоз: 11 часын – Можгаысь Т.К. Борисов нимо педколледжын, 14 часын – Уча черкогуртын.

Тодэ вайытом, Можга ёросысь литературалэсь нуналъёссэ сӥё-дано Удмуртиысь Калыкъёслэн эшъяськон юртазы 30-тӥ южтолэзе усьтӥзы. Быдэс ар ӵоже Ижкарын но ёросысь гуртъёсын Йӧскалык лыдӟетъюртэн радъям книгаосын но туспуктэмъёсын адӟытонъёс, творчествоя пумиськонъёс, конференциос, вожвылъяськонъёс ортчизы. Ваньмыз соос Можга ёросысь гожъясьёслы но лулчеберет удысын ужасьёслы сӥземын вал. 2016-тӥ арын Удмуртиын Алнаш ёрослэн литератураезлэн нуналъёсыз ортчизы.

Удмуртиысь муниципал кылдэтъёслэн литературазылы сӥзем нуналъёс — элькунысь Йӧскалык лыдӟетъюртлэн ӵектосэз. Элькунысь Лулчеберетъя но туризмъя министерство юрттэмен ӵектос йӧскалык но шаертодон литератураез вӧлмытон, тросгес адямиослы лыдӟиськыны мылкыд сётон вылысь радъяське.