Москваын Герберын валтӥсь крезьгуро куно луоз фольклор кырӟанъя но эктонъя «Айкай» театр
Удмуртилэсь вашкала но туала крезьгуро лулчеберетсэ быдэс нунал ӵоже возьматозы тодмо но творчествоын сюрессэс али кутскись кырӟасьёс но коллективъёс.
«Айкай» азьын сцена вылэ потоз Иван Белослудцевлэн «Суоми» группаез. Нош праздникез усьтэм бере ик люкаськем калык тодматскыны быгатоз «Детская новая волна — 2017» калыккуспо конкурсын вормисен Арина Петроваен. Концертэз азьланьтоз Ижкарын вордскем кырӟась Евгений Гор. Асьсэ кырӟанъёсазы вашалазэ но туалазэ пӧлэстозы егит кырӟасьёс Катерина КенJали но Чупай Эли.
Озьы ик Гебере пыриськозы тодмо кырӟасьёс но кутскись рок-крезьгурасьёс — Татьяна Зыкина, «Silent Woo Goore» но «Малыми» группаос, Марк Юсим. Ваньзы соос ошмесо шаерын — Удмуртиын — вордскемын.
Фестивале вуоз «Прага LIVE» кавер-группа, вотэсын туж тодмо луиз соин быдэстэм «ВРИО» кырӟан. Учкисьёсты задор мылкыдыныз, баянэн йӧспӧртэм шудэменыз но кырӟанъёсыныз «ӝуатоз» Анна Плотникова. Нимысьтыз куно луоз «Голос» ӵектосэ пыриськем Екатерина Чистова, со Воткаын вордскемын.
Быдэс нунал ӵоже «Эрмитаж» садын крезьгуръёсты шудозы «Электроники DJ’s». Кунмылэн шоркараз Гербер «Эктоника» дискотекаен йылпумъяськоз.