Монаколэн Стефания принцессаез лыктоз Ижкаре Цирк искусствоя калыккуспо фестивале

«Стефания принцесса ми доры куное лыктыны быгатоз – ойдолэ, али озьы гинэ шуом, син медаз усьы – шуыса вераз. Цирк дуннеын со нырысетӥ адями, шуыны луоз. Ӵапак со Монте-Карлоын дуннеысь тужгес дано цирк фестивалез чакла но коньдон сётэ. <…> Со асьме фестивале ӧтёнэз басьтӥз, асьме артистъёслы но радъясь комитетлы дурбасьтыны, ваньзылы вазиськыны-пумитаны», — вераз Андрей Лещинский.

Стефания принцессалэн Удмуртие вуылонэз пумысен рос-прос ивортонъёс ӧвӧл на, быдэс программаез дасян но соглаштон понна радъясьёслэн куинь арнязы вань на, вераз Андрей Лещинский. Радъясь комитет понна со ватсаса кылкутон. Монакоысь принцесса лулчеберетъя одӥгаз ужъюртэ но пиналъёсты дышетон интые вуылыны мылкыдзэ вераз. Нырысь чакланъёсъя, со одӥг нуналлы гинэ лыктоз.

Ватсалом, Стефания принцесса – Монакоысь Ренье III князьлэн но Грей Келли киноактрисалэн ичиез нылзы – 2005-тӥ арысен Монте-Карлоын калыккуспо цирк фестивальлэн радъясь комитетэзлэн тӧроез луэ. Радъясьёслэн верамзыя, та дырозь со Россиын Москвае но Санкт-Петербурге гинэ вуылӥз.

Тодэ вайытом, Ижкарын Цирк искусствоя XII калыккуспо фестиваль 6-10 южтолэзе ортчоз. Ужрадэ 15 кунъёсысь 200 пала артистъёсты возьмало.

https://udmurt.media/udm/news/kultura-i-turizm/50891/