“Мон – удмурт” возьматон ужа Дэбесын

Дэбесын дано югдытӥсьлы сӥзем литературно-художественной композици кылдытӥз Дэбес ёросысь культурая но туризмъя «Сибыр сюрес» методцентрысь ӧнерчи Галина Опарина. “Мон-удмурт” нимаське со. Ачиз ӧнерчи нырысь-валысь пиналъёсын ужаз, соин ик маин соосты паймытыны ӟеч тодэ.

«Нылпиос огшоры мадемез пелязы уг поно, – вера Галина Опарина. – Соин ик композицие шудонъёс, кырӟанъёс пыртӥ. Пиналъёс крезьгур инструментъёсын шудо, тылыен гожъясько. Вань ужъёс Кузёбай Гердэн герӟаськемын. Пиналъёслы тунсыко йӧтэ. Собере Герд сярысь тросгес тодо».

Композициез дасяны юрттӥсьес луизы ёрос лыдӟиськонни, кибашлыослэн юртсы, интыысь шаертодонъя музей. Соос ӵектосэ мыло-кыдо пыриськизы возьматонын кутӥськись материалэнызы, арбериосынызы.

Ватонэз ӧвӧл, та дыре Герд сярысь тодӥсьтэмез трос ай. Уката ик ӟучомем калык пӧлын. Дэбесысь «Мон – удмурт» композициез учкыны 150 пала мылкыд карисьёс вуылӥзы ини – со нылпиос но, арлыдоос но. Озьыен, удмурт югдытӥсь сярысь тодӥсьёс пӧламы йылӥзы.

Ватсаса. 15-тӥ тулыспалэ Кузёбай Гердлэсь водӥськем нуналзэ элькун лыдӟонъёсын пусъёзы Вавож ёросын. Татын пӧртэм пуштросо ужъёсты кылзыны луоз. Тодосчиос но ВУЗ-ёсын, школаын дышетскисьёс Гердлэн ужъёсызъя докладъёс лэсьтозы.

Вераны кулэ, Герд лыдӟонъёс элькунын 1988-тӥ арысен радъясько. Арлы быдэ нимаз быръем тема мургес усьтӥське: «Герд но дыр», «Герд но удмурт кыл», «Кузёбай Герд – дано дышетӥсь». Туэ ортчоно пумиськон “Герд улэ асьмемын ӵош” ним улын радъяськоз. Асьсэлэсь докладъёссэс лыдӟозы тодосчиос, Кузёбай Герд гимназиысь но Гурезь-Пудга школаысь дышетскисьёес. Татын ик, котьку сямен, йӧскалык премиос сётъялозы.

http://www.myudm.ru/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий