«Мисс Этно» ним басьтӥз удмурт нылаш Анастасия Самигулова «Мисс International – Ufa» вожвылъяськонын
Пӧртэм йӧслыко 12 нылашъёс учкисьёсты но жюриез асьсэ калыкенызы тодматӥзы но творчествоя быгатонлыкъёссэс возьматӥзы. Конкурслэсь валтӥсь кузьымзэ но «Miss International – Ufa» нимез Таджикистанысь Рано Умурзаковалы сётӥзы. Нырысетӥ вице-мисс Грузиысь Карина Ахвледиани луиз, нош кыкетӥ вице-мисслэсь короназэ Баймак ёросысь Наркяс Арабаева басьтӥз.
Ужрадэз Калыкъёслэн эшъяськон юртсы но Башкортостанысь лулчеберетъя министерство Егитъёсын ужанъя федерал агентстволэн грантэз чотын радъязы. Кызьы пусйиз проектлэн авторез Земфира Рашитова, та ужрад солэн улоназ одӥгез валтӥсез луиз.
«Вераны луэ, ми проектэз умой быдэстӥм. Финалисткаос яркыт но данъяськымон асьсэ калыкенызы тодматӥзы, нош валтӥсез – Конгресс-холлэн залэз калыкъёслэн огазеяськон но эшъяськон мылкыдэнызы пыӵатэмын вал. Ужрад вань арлыдъёс понна площадка кылдытэ, кытын яркыт шоу пыр котькудӥз пӧртэм кунъёслэн йылолъёсынызы но лулчеберетэнызы тодматскыны быгатэ», — вера Земфира Рашитова.
Тодэ вайытом, вожвылъяськонлэн быръён люкетаз Башкортостанын улӥсь 20 йӧслыкъёслэсь 60-лэсь трос куриськонъёс вуизы.