Мигрантъёслы выль лулчеберетлы дышыны юрттонъя ӵектос быдэстӥське Ижкарысь школаын
Та ӵектос 2016-тӥ арын кылдӥз. Ӵапак со дырысен школаын мукет кунъёсысь дышетскисьёсын воштӥськон программа ужаны кутскиз но Ижкаре Таиландысь, Италиысь, Германиысь быдэ вуымтэос лыктӥзы. Со сяна, 17 номеро школаын мукет пичи но бадӟым калыкъёсысь пиналъёс дышетско, ваньмыз 50-лэсь ятыр йӧслыкъёс.
«Ми валам, ми ӧтиськом кун сьӧрысь дышетскисьёсты, но милям вань пиналъёсмы, кудъёсызлы милям юрттэтмы кулэ. <…> Вуо асьсэ школаосысь, кытын соос туж умой тодо вал математикаез, физикаез, географиез, но тодметъёсты дышетон соослэн анай кылынызы мынэ вал. нош ми доры соос лыкто, милям дышетонмы ӟуч кылын мынэ. Ӵемысь, материалэз тодыса но, соос милемлы сое вераны уг быгато. Соин ик ми малпам, воштоно валанъёсмес, та пиналъёслы школаын умой мед луоз шуыса», — вераз Удмуртиысь йӧскалык политикая министерстволэн паськытатэм коллегияз школаысь дышетӥсь Наталья Кельдиярова.
Дышетсконниын ужасьёс валазы, та югдурез ас понназы тупатыны уз быгатэ шуыса, соин ик анай-атайёслы вазиськизы. Анкетирование ортчытыса, шедьтӥзы со семьяосты, кудъёсызлы выль интылы дышон вылысь юрттэт кулэ, но соосты, кин та юрттэтэз сётыны дась. Собере дышетсконниын ӟуч лулчеберетэн, сям-йылолъёсын, кылэн тодматонъя ужрадъёс ортчытъяськыны кутскизы. Школаын конференци, Калыккуспо кенешонлэн нуналэз, ӟуч лулчеберетъя арня, ӟуч классикъёслэсь произведениоссыя театр лыдӟонъёс радъяськизы. Кызьы пусйиз Наталья Кельдиярова, та уж ваньмызлы пайдаен берытскиз.
«Утӥзы ваньзы: волонтёр семьяосысь пиналъёс но, школа но, кун сьӧрысь дышетскисьёс но, валамон, быдэсак мерлык но. Бадӟым отзыв вал со семьяослэсь, кудъёсыз та ужез быдэстӥзы, семьяослэсь-волонтёръёслэсь. Соос шуизы, ми мукет сямен учким асьме семьямы шоры, мукет сямен адӟим сое, мар бордын ужано асьме семья пушкын», — вера Наталья Кельдиярова.
«Семейное волонтёрство» ӵектос школаын азьланьтӥське. Радъясьёс, мигрант пиналъёслы сяна, соослэн анай-атайёссылы но выль кунын улыны дышыны юрттэт сётыны тыршо.
Тодэ вайытом, Йӧскалык политикая министерстволэн коллегиез йӧскалык ужпумъёсты интыосын быдэсъянлы сӥземын вал.