Марий Элысь Карлыган гуртын Удмуртиысь калык писателен Вячеслав Ар-Сергиен пумиськон ортчиз

Та нуналлы Вячеслав Ар-Серги “Перекрёстки” книгазэ поттӥз. Карлыганын выль бичетэн тодматскон но асэныз авторен кенешон ортчиз. Нырысетӥез презентация юнме татын ӧз ортчы, ӵапак Вачеслав Ар-Сергилэн выль книгаез Марий Элын печатламын.

Гожъяськисез татын туж гажало шуыса зол шӧдӥськиз. Бен, аслаз но Вячеслав Ар-Сергилэн Пор шаерен туж ӟеч кусыпъёсыз. Дышетскон аръёсаз диалектология экспедицие татчы вуылэм, ньылетӥ курсын Йошкар-Олаын куинь толэзьем практика ортчем.

“Кема ымы ӧз берытскы тодмотэм кылъёсты вераны. Но сӥзьыл гуртысь пиосты армие келян юмшатонэ сюрыса, ӵукназэ пор кылын ӟечбуръяськыса сайкай”, – вера гожъяськись.

Али гинэ потэм книгаен тодматсконэ пыриськизы библиотекаосын ужасьёс, дышетӥсьёс но школаын дышетскись пиналъёс. Котькудӥз писательлы юан сётыны быгатӥз. Тунсыко юан понна кузьым – книга, авторен ӵош туспуктэм. Вожмаськыса сямен юан сётъязы нылпиос. Пумиськонмы пӧрмиз, туж шуныт ортчиз!

Ужрад “Удмурт Кенешлэн” ӵектосэз улсын Удмуртиысь Лулчеберетъя министерство юрттэмен радъяськиз.

Вячеслав Ар-Серги (Сергеев Вячеслав Витальевич) – удмурт гожъяськись, Россиысь писательёслэн огазеяськонзылэн ёзчиез, Удмурт Элькунысь культура удысысь сӥё-дано ужась, Удмурт Элькунысь калык гожъяськись. Туала удмурт гожъясьёс пӧлысь одӥгез валтӥсез. Нырысетӥ ужъёсыз печате потӥзы 1970-тӥ аръёслэн пумазы. Нош нимаз книгаез 1986-тӥ арын поттэмын вал “Ӝыт куараос” нимын. 1989-тӥ арын В. Ар-Серги кутэмын СССР-ысь Писательёслэн огазеяськоназы. Та дырозь 40-лэсь уно книгаос поттӥз ини. Вячеслав Ар-Серги — Удмурт Элькунысь лулчеберет удысысь сӥё-дано ужась. Россиысь Антон Дельвиг нимо литературной премилэн лауреатэз, калыккуспо “Югра” литературной премилэн лауреатэз, Удмурт Элькунысь Правительстволэн литературной премиезлэн лауреатэз но мукет.

 

vk.com/udmurtkenesh

Поделитесь с друзьями:

Журналист, редактор, контент-менеджер сайта, СММ специалист, оператор-постановщик интернет-телеканала "Даур ТВ"

Дом Дружбы народов
Добавить комментарий