Мар со — Гордкушман сюан?
Музейлы инъет кылдытӥз ёросысь одӥгез азьветлӥсь, ёрос культурая юртын кема аръёс ӵоже ужам Мария Шкляева. Экспонатъёс люкаса, со гуртысь гуртэ валэн уробоен ветлӥз. Озьы удмуртъёслэн гурт котыразы кутӥськись арбериос люкаськемъя 1981-тӥ арын пичигес гинэ музей сэрег кылдытыны луиз ни.
Аръёс ортчемъя музей пумен паськытаз. Туннэ нуналлы 4 сюрслэсь ятыр экспонатъёс синъёсты шумпотто, историе выйыто ни. Калык ачиз но музейчиослы аръян шукконъёссэ, черсъёссэ, лянэсъёссэ, зыбкаоссэ но трос мукетсэ вае.
Табере музейлэн интыез но вӧл-вӧл. Туристъёсты пумитаны, пӧртэм ужрадъёс ортчытъяны туж умой.
— Ёросамы улӥсьёс сяна, дорамы ӧжыт уг кожыло палэнысь куноос но, — вера музейысь методист Лариса Широбокова. — Туэ гужем, кылсярысь, китайёс вуылӥзы. Кӧня бергазы экспонатъёсмы котыртӥ, кӧня милемлы тау каризы!
Эшшо музейчиослэн яратоно кунооссы — нылпиос. Соос куриськыса ик лыкто татчы! Туж сак кылзо вашкалаосмылэн улэм-вылэмзы сярысь мадёнъёсты: кызьы, маин сиськизы, кызьы дӥсяськылӥзы… Асьсэос но кут кутчаса эскеро, шортдэрем дӥсяло. Таӵе пумиськонъёс огшоры гинэ уг ортчо, одно радъясько на мастер-классъёс, удмурт шудонъёс.
Музейчиослэн матысь юрттӥсьёссы — «Кубо» огазеяськонэ ветлӥсь песянай-песятайёс. Соос туж умой тодо на вашкала якшур-бӧдьяослэсь сям-йылолъёссэс, лэчыт веранъёссэс, мадиськонъёссэс.
Лариса Широбокова соосты гожъяз, нимысьтыз сборник но люказ ни — зӧк гинэ со пӧрмиз!
Троссэ сям-йылолъёсты музейчиос выльысь улӟыто. Кылсярысь, «кубоослэн» верамъёссыя соос калык азе поттӥзы ни песянай-песятайёссылэсь армие келян йылолзэс. Туж тунсыко потӥз вашкала «Гордкушман сюан» но — сое Якшур-Бӧдья палъёс гинэ ортчытъяло вылэм, лэся — мукет интыосын та йылолэз тодазы вайисьёс ӧвӧл. Бӧдья песянай-песятайёс сое ортчытъязы Пукро котырын, сад-бакча емышъёсты данъяса. Празднике лыктылӥзы, чебер шортдэремъёссэс дӥсяса, нош йыръёсазы, гордкушманлэсь сяна, мукет емышъёслэсь но, кылсярысь, каунлэсь, коронаос лэсьтылӥзы, соосты турлы сяськаосын чебертылӥзы. Озьы соос уртче шулдыръяськылӥзы: эктӥзы, кырӟазы, мадиськизы… Та сям-йылолэз музейчиос озьы ик улӟытӥзы ни — калыклы со туж яра.
— Тэк пукыны ум быгатӥське, — шуэ Лариса Широбокова. — Ёросамы, элькунамы кыӵе ужрадъёс ортчыло, одно пыриськыны выриськом. Асьмелэсь ужмес возьматӥськом, мукетъёсызлэсь дышетскиськом.