Маин бай Байтэрек?
Таяз шутэтскон нуналъёсын Фин-угор дуннелэн лулчебертъя шоркараз – Алнаш ёросысь Байтэрек гуртын – нырысьсэ ортчиз этнофутуризмлы сӥзем «Бай-Тэрек» фестиваль.
«Фин-угор дуннелэн шоркарез» ним арлы быдэ сётъяське фин-угор кунъёсысь, улосвылъёсысь гуртъёслы но каръёслы. Та нимэз утон понна соос куриськон кельто, улоссэз азинтон понна проект гожто. Туэ таӵе вожвылъяськонын Байтэрек вормиз.
Фестивале Удмурт Элькунысь но палэнысь калык кылосэз утись коллектитвъёс, кибашлыос, суредаськисьёс, этнофутуристъёс пыриськизы.
Ужрадэ вуылӥз шаерысьтымы Йӧскалык политика министр но.
– Шаерамы улӥсь калыкъёслэн лулчеберетэнызы тодматскыса гинэ, ми сое яратыны, мургес гажаны кутскомы, – пусйиз Эдуард Петров.
Фестивальлэн куноосыз концерт учкон сяна, пӧртмэс мастер-классъёсы, перформанъёсы пыриськизы, сиён пӧранъя «Чечым!» конкурсэ пыриськизы.
Тодады вайтом, «Фин-угор дуннелэн шоркарез» ним Удмуртие вуылӥз ни. 2014-тӥ арын сое Шаркан ёросысь Быгы гурт утӥз вал.