Мадьяр фильмъёсты нош ик возьматозы Ижкарын

«Котьку сямен ик, программа пӧртэмлыко, отчы пыртэмын мадьяр киностильлэн туж пӧртэм, пумит луись палъёссэ – улэп классиклэн Марта Месарошлэн ненег киноеныз кутскыса, солэн кык фильменыз ми усьтӥськом фестивалез, серийной маньяк сярысь пеймыт но кӧшкемыт триллерозь», — вера Андрей Смирнов, Ижкар киноклублэн кивалтӥсез.

Ижысь киноклуб та фестивалез Венгрилэн Москваысь лулчеберетъя центреныз но Казаньысь Валтӥсь консульствоеныз ӝыны ар пала дасяз.

Котькуд фильм одӥг пол гинэ «одӥг ӝыт – одӥг фильм» амалъя возьматэмын луоз.

Мадьяр киноя фестивальлэн программаез:

• 18-тӥ коньывуонэ 19 часын – «Их двое» (16+), 1997-тӥ ар, режиссёрез Марта Месарош. Яратон сярысь киноын валтӥсь ролез француз актриса Марина Влади шудӥз. Озьы ик режиссёр эпизодэ ӟуч артистэз Владимир Высоцкиез ӧтиз. Та одӥгез гинэ фильм, кытын кузпалъёс ӵошен шудӥзы.
• 19-тӥ коньывуонэ 19 часын – «Аврора Бореалис: Северное сияние» (16+), 2017-тӥ ар, режиссёрез Марта Месарош. Одӥг семьялэн улон-вылонэз, драма.
• 20-тӥ коньывуонэ 19 часын – «1945» (16+), 2017-тӥ ар, режиссёрез Ференц Тёрёк. Одӥг пӧсь нуналэ пичи мадьяр каре Холокост пыр потэм адямиос вуо — атаез но пиез.
• 21-тӥ коньывуонэ 19 часын – «Кинчем» (16+), 2017-тӥ ар, режиссёрез Габор Херенди. XIX даур шоры туала учкон, аспӧртэм яратон но пунэмзэ берыктон сярысь история.
• 22-тӥ коньывуонэ 19 часын – «Монстр из Мартфю» (18+), 2016-тӥ ар, режиссёрез Арпад Шопшич. Улонысь учыр вылын кылдытэм триллер.
• 23-тӥ коньывуонэ 19 часын – «Свинг» (16+), 2014-тӥ ар, режиссёрез Чаба Фазекаш. Кырӟась нылкышноос сярысь крезьгуро комедия.

Ваньмыз фильмъёс мадьяр кылын ӟуч субтитръёсын мынозы.

Фестивале билетъёсты «Россия» киноцентрысь басьтыны луэ.