«Люр-ляр» театр ужа Яр каргуртын

Репертуарзы пичи али ке но, фестивалъёсын вормисьёс потылӥзы ини. Нырысьсэ нылпи театр коллективъёслэн Пичи Пурга ёросын ортчем фестивалязы пыриськиз. Отысь пиналъёс нырысетӥ степенё лауреатъёс луыса бертӥзы. Туэ Ижкарын радъяськем фестиваль-конкурсын «Люр-лярысь» нылпиосты кыкетӥ степенё дипломен дунъязы.

Коллективе ветлӥсь ваньмыз ик нылпиос гуртъёсын будэмын. Каргуртэ улыны выжыса соос ӟучомизы, шуэ кивалтӥсьсы Валентина Дементьева. Соин ик малпан кылдӥз удмурт нылпи театр кылдытыны. Пиналъёс медам вунэтэ выжыоссэс, анай кылзэс, лулчеберетсэс.

«Каллен-каллен чакласько но, нылпиос ас понназы  удмурт кылын верасько ини, — шуэ Валентина Деменьева. – Анай-атайёсынызы юн трос ужасько, колективмылэн ужаз кыскисько. Соос репетициосамы но ветлыны кутскизы ини. Гужемлы пиналъёслы но анай-атайёслы дорысь уж сётӥ – куспазы тросгес удмурт кылын вераськыны».