Лобаны быгатӥсь воргорон Григорий Григорьев

Программистэн, андроид приложениосты, удмурт кылын даслэсь трос мобильной приложениосты но виджетъёсты кылдытъясь Григорий Григорьевен “Удмурт дунне” газетын потэм интервью

Григорий Григорьевлы луыса удмурт кыл туала улонэн ӵош вамышъя, планшетъёсы, смартфонъёсы пыӵа, быдэс дуннее вӧлме. Гриша — программист, андроид приложениосты, удмурт кылын даслэсь трос мобильной приложениосты, виджетъёсты кылдытӥз. Со сяна, Гриша… лобаны быгатӥсь пияш.

— Гриша, палэнысен учконо ке, программистъёс — туж аспӧртэм адямиос: соос маке сыӵезэ тодо, мае уг тодо мукетъёсыз. Нош тон астэ аспӧртэм адямиен шӧдӥськод-а?

— Малпасько, ми ваньмы пӧртэмесь, котькуд адямилэсь кыӵе ке аспӧртэм сямзэ шедьтыны луоз. Нош программистъёс висъясько, дыр, асьсэлэн малпаськон амалэнызы, малы ке шуоно ужзы ӵемысь герӟаськемын сыӵе арбериосын, кудъёссэ адӟыны уг луы. Туж троссэ йырын бергатыны кулэ. Программированиез мон ӵошатысал шахматэн. Та шудонын кадь ик, программист трос вамышъёслы азьлань учкыны кулэ. Шуом, адями тынад программаеныд ужа. Ма кароно, со программадэ медаз тӥя шуыса? Ваньзэ азьлапал малпано но программадэ сыӵе тӥяськонъёслэсь утьыны тыршоно.

— Озьыен, программист нырысь ик математик. Но удмуртъёслэн тодмо математикъёссы чиньыен лыдъямон. Кызьы тон, пичи гуртысь пияш, программирование борды кыстӥськид?

— Мыным малы ке но пичи дырысеным ик йырвизез тӥясь (логической) задачаосты лэсьяны кельше вал. Нош уравнениосты лэсьяны ӧй яратылы, соос мыным лултэмесь потылӥзы.

Атае но, анае но школаын математикаез яратӥллям. Атае Пичи Пурга ёросысь Выль Мӧнья гуртын вордӥськемын, анае — вӧзысь Вуж Мӧньялан. Семья кылдытэмзы бере соос ёросысьтымы ик Сосновка гуртэ улыны интыясько. Атае водитель луыса ужа, анае АЗС-ын. Сосновкаын соослэн 3 пиналзы вордӥське. Мон пичиез. Мыным одӥг-кык арес котырын семьямы атаелэн вордӥськем палъёсаз, Выль Мӧньяла, кошке.

8-тӥ классын дышетскыкум, компьютере кылдӥз. Зэмзэ вераса, сое агаелы басьтӥзы вал, но мон но бордаз пукси. Мыным туж тунсыко вал тодыны, кызьы ужа компьютер. Нош школаын милемыз программированилы соку уг дышето на вал. Соин огпол, Ижкаре вуылыкум, шедьтӥ Паскаль программирование кылэз дышетонъя книга, басьтӥ сое. Та книгаез лыдӟеме бере монэ ёрос центрамы, Пичи Пургала, информатикаен олимпиадае келязы. Отын мон аслэсьтым нырысетӥ программаме гожтӥ но 2-тӥ инты басьтӥ. Аслым ачим туж пайми. Соку ик малпай, программистэ дышетскыны мыно шуыса.

Удмуртъёс пӧлын программистъёс ӧжыт шуыны уг луы, дыр. Мынам тодмоосы, эшъёсы пӧлын вань кужмо удмурт программистъёс, соос гуртын будэмын, но, жаляса верано, удмурт кылзэс туж ляб тодо.

— Нош удмурт кылэз Интернет пыр вӧлмытыны малпанэд кызьы кылдӥз?

— Школаез йылпумъяме бере пыри Удмурт кун университетэ. Городын шӧдӥ, мыным удмурт кыл уг тырмы шуыса. Гуртын ваньмыз удмурт кылын гинэ вал, нош татын куддыръя вазьыны но нокинлы. Соин ик удмурт кылэз тодӥсь эшъёсыным котьку анай кылын вераськыны турттӥсько вал, ог-огенымы пумиськылыкумы гинэ ӧвӧл, вотэс пыр но. 2011-тӥ арын Роман Романов но Алексей Емельянов удмурт программистъёс «ВКонтакте» вотэс бамез удмурт кылэ берыктӥзы. Мон туж шумпотӥ! Та учыр монэ но бурдъяз вотэсын мар ке удмуртсэ лэсьтыны.
Со вакытэ компьютерам удмурт шрифтлэн раскладкаез вал ини, соин ик эшъёсыным мон, аффрикатаосты (ӝ, ӧ, ӵ, ӥ, ӟ) кутыса, гожъяськи ни. Но браузер удмурт кылъёсме ултӥз гордэн пусъе — шонер уд гожтӥськы, пе. Валамон, со ӟуч кылэз гинэ вала бере, удмуртсэ янгыш каре. Соин ик югдурез тупатоно кариськи. Туж трос утчаськи, кызьы программа эскере шонер гожъянэз (правописаниез). Валай, соин Hunspell программа выре но солы нимысьтыз дасям кыллюкам кулэ шуыса. Кӧня ке толэзь ортчыса, мон удмурт правописаниез эскерись кыллюкам кылдытӥ. Валамон, отын трос янгышъёсыз кылизы, озьы ке но со быгатэ ни вал эскерыны но тупатыны 9 миллион пала удмурт кылъёсты. Та сярысь мон вотэсын гожъяны кутски. Озьы монэ удмурт активист Алексей Шкляев шедьтӥз но «установщик» лэсьтыны дэмлаз. Со сыӵе программа, кудӥз адямиослэн компьютеразы удмурт раскладка но шонер гожъяськонъя кыллюкам пуктыны юрттэ. Озьы кылдӥз udmspell.ru вотэс бам но UdmurtPackage программа. Табере вань мылкыд карисьёс, пичи но сюлмаськытэк, вотэсын удмурт сямен гожъяськыны быгато.

Лобаны быгатӥсь воргорон Григорий Григорьев

— Но тон таин гинэ ӧд буйга. Андроид (Android) операционной системалы удмурт кылын приложениос лэсьтонъя проектэ пыриськид. Нош собере телефонъёслы но планшетъёслы удмурт кылын приложениос кылдытъяны кутскид. Ваньмыз со аслад мыл­кыдыдъя, малпамедъя яке кинлэн ке заказэзъя?

— Андроидлы приложениос мон лэсьяны кутски 2012-тӥ арысен. Огпол егит удмурт ужбергатӥсь Вася Широбоков мыным гожтӥз: андроидэ но удмурт раскладка кулэ, пе, вал, телефонысен но удмурт сямен гожъяськыны мед луоз шуыса. Аслам мынам соку андроидэн телефонэ ӧй вал ай, но солы программа гожтон малпанэ йырам бергаз ни. Озьы, кӧня ке дыр ортчыса, удмурт раскладка кылдытӥ но Интернет лавкае поттӥ, кинлэн потэ, ваньзы асьсэлы мед пуктозы, малпай. Озьы ик удмурт-ӟуч кыллюкам лэсьтыны быгатӥ. Мыным туж кельшиз андроидлы приложениос лэсьяны, соин андроид-разработчик луыса ужаны кутски.

— Тынад сюлмаськеменыд, кылдытэмын смартфонъёс пыр удмурт кылэз дышетыны луонлык сётӥсь «Кылдысин» приложение. Котькуд мылкыд карись сое аслаз телефоназ дунтэк пуктыны быгатэ. Кызьы со бордын ужад? Кӧня адями та приложениез аслыз пуктӥз ни?

— Удмурт кылэз дышетонъя приложение лэсьтэме кемалась потэ ни вал. Адӟисько вал: кылэз дышетыны мылкыд карисьёс трос, но луонлыкъёс ӧжыт. «Кылдысин» приложениме 7 сюрслэсь трос пол пуктылӥзы (скачивать каризы) ни, мон понна со туж шумпотымон. Нош, шуом, удмурт клавиатураме 5 сюрс пол пуктылӥллям.

Удмурт приложениосы пӧ­лысь «Кылдысин» тужгес зол вӧлмиз, калык сое туж яратэ. Та приложение кылдытэмын вал, Нациосын ужан политикая министерство юрттэмен, нимысьтыз грант утыса. «Кылдысин» приложение бордын ужамы быдэс командаен: дизайнзэ «Монами» студия суредаз, кылъёсты но предложениосты анай кылъя дышетӥсьёслэн «Выжы» огазеяськонзылэн кивалтӥсез Ангелина Решетникова дасяз, нош лыдӟиз «Мынам Удмуртие»
ТРК-ысь журналист Светлана Пикулева.

Мынам мукет кылъёслы но приложениосы вань, кыл­сярысь, пор, тува калыкъёслэн азь­­ветлӥсьёссы вазись­кизы, мон соослэн анай кы­лыны­зы при­­ложениос, клавиатураос кыл­дытӥ.

Лобаны быгатӥсь воргорон Григорий Григорьев

— Азьланяз, пе, адямиез быдэсак воштозы компьютеръёс. Тынад малпамедъя, искусственной интеллект — ӟеч-а со, урод-а?

— Уг оскиськы, компьютеръёс адямиез быдэсак воштыны быгатозы шуыса. Золэз компьютер — ачиз адями. Со ужа биотопливоен. Зэм, искусственной интеллектэз адями ассэ ачиз кадь ик лэсьтыны турттэ. Мар солэсь пӧрмоз — тодмо ӧвӧл. Но искусственной интеллект милемлы эш луыны кулэ, со адямилэсь улонзэ каньылгес карон понна лэсьтӥське. Кыӵе ке профессиос бырозы, соос интые компьютеръёс, роботъёс луозы, но со вакытэ ик со компьютеръёсты, роботъёсты тупатъясь адямиос но тросгес кулэ луозы. Соин, малпасько, адями быдэсак ужтэк уз кыльы. Но мукет но сюлмаськонъёс кылдозы.

— Тодэ лыктэ «Восстание машин» фильм, отын адямиен кылдытэм визьмо роботъёс ассэ ик адямиез быдто. Улонын озьы луыны быгатоз-а?

— Улонын котьма луыны быгатэ, машинаослэн адямиослы пумит мынэмзы но, кыӵе ке мукет алама югдур но. Соин адями котьмалы дась луыны кулэ. Визьмо машинаосты лэсьтыку но, кулэ малпаны
кыӵе ке рубильник: секыт
югдур кылдыку, роботэз со мед кысоз.

— Али, коронавирус вӧл­мон вакытэ, пӧртэм онлайн программаослы, приложениослы, соосты кылдытӥсь адямиослы кулэяськон бу­дӥз-а?

— Программистъёс азьвыл но уг тырмо вал. Тани мон Москваысь одӥг компаниын ужасько, но ачим Ижын улӥсько, аслам ӝӧке, компьютере сьӧрын пукисько. Программистлэн сыӵе ини ужез — дуннелэн котькыӵе сэрегаз ужаны быгатод, Интернет гинэ мед луоз.

Озьы ик мон, гуртам пукыса, быгатӥсько Москваысь,
Санкт-Петербургысь, кунгож сьӧрысь кыӵе ке компаниос вылэ ужаны. Зэм, гуртын Интернет лябгес. Соин Ижын ик ужасько. Монэ ӵемысь пӧртэм компаниос доразы ужаны кыскало, кунгож сьӧрысь но ӧтёнъёс вань…

Нош коронавирус сярысь ке… Калыкез али дораз улыны косэмын, соин тросэз Интернетын пуко, фильмъёс учко. Соин сэрен Интернет уродгес ужа: ныпъетэз укыр секыт. Но азьланяз интернетлэн ӝоглыкез будоз гинэ. Тани али ӝог Интернетлэн 4G ӝоглыкез, но вань ини 5G ӝоглыкен но. Таиз кӧня ке поллы чаль ужа. Зэм, куд-огез шуэ, тазалыклы но со уродгес. Тани, пе, Великобританиын коронавирус сыӵе ӝог вӧлме укыр ӟеч Интернетэнызы валче — связез вӧлмытӥсь вышкаос янгышесь, пе. Но мыным ваньмыз
та серем гинэ, Интернетлэн ӝоглыкез тазалык вылын нокызьы уг шӧдӥськы, адямиез кышкатон гинэ со.

Лобаны быгатӥсь воргорон Григорий Григорьев

— Виртуальной улонэз зэмос улонэн воштысалыд-а?

— Ӧй, ӧй воштысал. Но, жаляса верано, али эшъёсыным но ӵемгес вотэсын вераськиськом, шер пумиськылӥськом. Со мыным уг кельшы. Компьютер сьӧрын нуналаз куддыр 12 часлэсь но тросгес пукисько. Соин эшъёсыным пумиськыны луонлык кылдэ ке, вань ужме куштыса, доразы дыртӥсько.

— Эшъёсыд, программистъёс пӧлын кушем нимыд Vorgoron (Воргорон). Туала вакытэ, тынад малпамедъя, кыӵе луыны кулэ зэмос удмурт воргорон?

— Кушем ним бырйыкум, мон малпай: вотэсын луыны кулэ воргорон, кудӥз маке ужалоз, маке кулэзэ лэсьтоз. Со сыӵе огшоры удмурт воргорон. Нош улонын зэмос удмурт воргорон — со сыӵе идеал, кудӥз доры кыстӥськыны кулэ. Котькуд адямилэн идеал сярысь аслаз малпанэз. Но котыр ласянь ӟеч гинэ луыны уг луы. Зэмос удмурт воргорон — со сыӵе адями, кудӥз аслэсьтыз яратоно ужзэ, сюрессэ шедьтӥз но со уженыз аслэсьтыз но калык­лэсь, матысь адямиосызлэсь улонзэс ӟечгес каре.

— Интернет пыр яратонлы оскиськод-а? Семья кылдытон сярысь малпанъёсыд вань-а?

— Мон оскисько Интернет пыр тодматсконлы, синмаськонлы, но, малпасько, вотэс пыр яратон луыны уг быгаты. Вотэс адямиез ватэ, со пыр уг лу адямиез быдэссэ адӟыны, шӧдыны. Семья кылдытон сярысь малпанъёсы кемалась вань ини, но малы ке мынам син азям уг пуксьы, кыӵе со луыны кулэ, соин, дыр, семья ӧй кылдыты на…

— Гурезь куасъёсын нискыланы яратӥськод шуыса тодӥсько. Эшшо кыӵе спорт тыныд матын?

— Гурезь куасъёсын нискыланы мыным туж кельше, нырысь ик, чебер инкуазез, чебер гурезьёсты адӟон понна. Нош кӧня адреналин бась­­тӥськод! Малпасько, котькуд адямилы улоназ огпол ке но гурезьёсы тубано. Мон Сочиын, мукет интыосын ворттылӥсько, Удмурт шаермес ке басьтоно — Нечкиноын. Зэм, ӵемысь огнам ветлоно луэ, угось ваньмыз эшъёсы уг быгато гурезьёсысь нискыланы: кин ке со вакыт ужа, кинлы ке со туж дуно потэ. Эшъёсын ӵош ворттылыны шулдыр. Нош огнад ке, со воксё мукет мылкыдъёс ни: тон азьлань лобиськод, инкуазь аслаз чебереныз усьтӥське — со мылкыдъёсты кылын вераны но уг луы!

Нош гужем мон яратӥсько великен ворттылыны, котькуд ӵукна яке ӝыт потаны тыршисько. Куддыръя эшеным, Виталий Пронин программистэн, ӵош ворттылӥськом. Быдэс нунал компьютер сьӧрын пукисько бере, улонам одно ик спорт луыны кулэ. Котькуд нунал 8 сюрс вамыш ке но лэсьтыны турттӥсько, кыре потасько,
толалтэ куасэн бызьылӥсько.

— Нош кызьы тон, математик, программист, крезьгур удысэ вуид, бас-гитараен шудыны кутскид?

— Уг тодӥськы, герӟаське­мын-а крезьгур но математика, но пӧртэм гуръёсты кылзыны мон яратӥсько. Пичи дырме тодам вайисько ке, гуртын одӥг юмшан но кырӟанъёстэк уг ортчы вал. Школаын дышетскыкум, кельше вал ӟуч рок: «Кино», «Король и Шут», «Агата Кристи» группаос но мукет. Соку ик мон акустической гитара басьтӥ. Туж потэ вал рок-группаын шудэме. Армиысь бертэме бере электронной гитара басьтӥ. Таиз сюлмыя ӧз луы. Удмурт азьветлӥсь Влад Степанов Peace Pu группа кылдытӥз но отчы бас-гитараен шудыны ӧтиз. Мон соку бас-гитараен уг шудӥськы на вал. Малпай, эскеро. Тодмоелэсь кури, шудыса эскери — пӧрмиз кадь. Собере магазинысь аслым басьтӥ ни. Зэм, али Peace Pu группа ӧвӧл ни, но мукет группаослэн, Ижысь «Арт-резиденцилэн» проектъёсаз одӥг-ог пыриськылӥсько.

Берло дыре кельше выль инди-группаосты кылзыны. Озьы ик — электронной крезьгур, кылсярысь, драм-энд-бэйс жанрен. Со туж шаплы, юрттэ мыным компьютер сьӧрын огсыр но ӝог ужаны, сыӵе вакытэ мон машина кадь малпаськыны кутскисько кадь потэ.

— Мон кылӥ вал, кыӵе ке лобась арбериос но лэсь­тӥськод шуыса?

— Мыным кельше электронной устройствоос бичаны. Али «Ютубын» трос дышетӥсь видео­ос вань. Озьы ар талэсь азьло бичай аслэсьтым квадрокоптерме, али соин рос-прос лобаны дышетскисько. Кызьы? Квадрокоптере вылэ видеокамера юнматӥ. Аппарат лоба, мон пультэн соин кивалтӥсько. Йырам шлем, нимысьтыз очки. Квадрокоптере инметӥ лоба, ваньзэ, мае адӟе видеокамера, мон адӟисько, ачим со квадрокоптер вылын пукем кадь. Озьы мон Выль Мӧнья гуртэлэн возь­ёсыз, нюлэсъёсыз вадьсытӥ лобасько, адямиосты, шуръёсты, нюкъёсты адӟисько. Тылобурдо кадь лобасько. Туж чебер! Квадрокоптере бадӟым ӧвӧл, 500 метре ӝутскыны быгатэ. Азьланяз, оло, кыӵе ке ӵошатсконъёсы но пыриськыны быгато.

Гуртэ мон котькуд шутэтскон нуналъёсы бертылыны тыршисько, угось отын уж ноку уг бырылы, анай-атаелы юрттӥськисько. Гуртын туж гань-гань, сюлэм буйга, ачид астэ кылзӥськод.

вераськиз Елена Миннигараева

Контентмейкер, мемолог и журналист

Дом Дружбы народов
Добавить комментарий