Лапландиысь Йоулупукки лыктоз Удмуртие

Солэн кылъёсызъя, 7-тӥ толсуре Ижкарын мукет выжыкыл геройёсын ӵош Йоулупукки фестивалез усьтон ужрадэ пыриськоз, нош 8-тӥ толсуре Шарканысь Тол Бабайлэн усадьбаяз люкаськемъёсты шулдыртоз.

«Ми быдэс Россиысь Дед Морозъёсты ӧтиськом, котькуд ар пӧртэм улосвылъёсысь лыкто. Потэ вал выльзэ героез, тӥни озьы малпан лыктӥз. Кемалась потэ ни вал ӧтеммы, но малы ке но ӧз пӧрмылы. <…> Нош али со (Йоулупукки – ред.) соглаш луиз, зэмзэ но та вакытэ вуоз шуыса», — вераз Шаркан ёросысь Лулчеберетъя но туризмъя ёзэтлэн кивалтӥсез Лариса Горбушина.

«Выжыкылысь геройёс Тол Бабайлэн шаераз» фестиваль Удмуртиын сизьыметӥзэ ортчоз ни. 7-8 толсуре элькунамы Великий Устюгысь Дед Мороз, Татарстанысь Кыш Бабай но Кыркызы, Вятские Поляныысь Девица-Метелица но мукет выжыкыл геройёс вуозы. 7-тӥ толсуре фестиваль ужрадъёс Ижкарын ортчозы, мукет нуналаз — Шарканын.

Тодэ вайытом, али Удмуртиын «Лымыныллы корка» вожвылъяськонэ макетъёсты кутон мынэ. Азьланяз соя зэмос корка пуктыны чакламын.

https://udmurt.media/udm/news/kultura-i-turizm/45120/