Кышномуртъёслэн тазалыксылы но пиналъёсты удмурт кыллы дышетонлы саклык висъялоз «Удмурт нылкышно кенеш» 2020-тӥ арын
12-тӥ толсуре огазеяськонлэн азьветлӥсьёсыз ортчись арын ужамзылы йылпумъянъёс лэсьтӥзы но вуоно арлы ужпумъёс пуктӥзы. Со сярысь нылкышно кенешлэн «ВКонтакте» мерлыко вотэсысь огиназ ивортэмын.
Удмурт нылкышноослэн азьветлӥсьсы Надежда Степанова верамъя, таяз арын бадӟым саклык висъязы «Выжы-выжы-выжыкыл» нылпи элькун фестивальлы. Озьы ик ёросъёсын «Пичи чеберайёс но батыръёс» вожвылъяськонъёс ортчизы.
Жаляса верано, таяз арын устооссэ элькун сцена вылын люканы ӧз пӧрмы
Кенешонэ пыриськисьёс та вожвылъяськонъя рос-прос ӵектос гожтыны но азьмуртлэн грантъёсъя фондаз куриськон келяны кулэ шуыса вераськизы. Тодэ вайытом, кылем арын «Пичи Чеберайёс но Батыръёс» VII элькун нылпи фестивальлэн йылпумъян люкетэз Ижкарын Калыкъёслэн эшъяськон юртазы ортчиз.
«Удмурт Кенеш» огазеяськонлэн тӧроез Татьяна Ишматова Ижкарысь нылпи садъёсын удмурт кылъя кружокъёсты но урокъёсты урето шуыса вераз но нылкышно кенешлэсь азьветлӥсьёссэ та югдурез эскерыны но дышетонъя управление гожтэт дасяны ӵектӥз.
Озьы ик семья йылолъёсты утён понна кылдытэм «Табань» клублэсь ужзэ азьланьтыны кенешизы. Матысь пумиськонзэс толсуре-толшоре ортчытыны малпало. Выль арлы сӥзем ужрад огазеяськонлэн ёрос ёзэтъёсыныз ӟечгес кусып тупатыны луонлык сётоз.
Со сяна, вотэсын пӧртэм вожвылъяськонъёсты, ёросъёсысь нылкышно клубъёслэсь иворъёссэс вотэсэ поттонэз азинтыны, гуртъёсысь нылкышно гожъяськисьёсын пумиськон радъяны ужпум пуктӥзы.
Эшшо 2020-тӥ арын оштолэзе «Удмурт нылкышно кенеш» огазеяськонлэн йылпумъян-быръён конференциез ортчоз. Солы али ик дасяськыны кулэ ни.