Кырӟан бере вордӥське малпан
Пӧртэм ӧз лу туэез ар но. Гужемлэн нырысетӥ нуналаз Башкортостанысь Татышлы ёросысь Выль Татышлы гуртэ люкаськизы Татарстанысь, Марий Элысь, Пермь, Киров но Свердловск улосъёсысь 15 пала удмурт коллективъёс. Гуртлэсь кыдёкын ик ӧвӧл нюлэс кушын, шулдыр интыын, радъямын вал нимысьтыз площадка, люкаськизы уно учкисьёс.
Пӧртэм улосъёсысь вуэм коллективъёс туж усто кырӟазы но, эктӥзы но. Озьы ик возьматӥзы удмурт сям-йылолъёсты: гуждор вылын шудон, дэра миськон, ӝӧккышет вӧлдон но трос мукет. Та фестиваль вожвылъяськон выллем ортче бере, котькудӥз коллектив, вань сюлмысь возьматыны тыршиз удмурт выжыосты утемзэ.
Быръемын вал устоосыз пӧлысь устоосыз: нырысетӥ интые потӥз Киров улосысь Вятские Поляны городысь «Чипчирган» ансамбль, нош 2-тӥ интыез люкиз 2 коллектив — Башкортостанысь Татышлы ёросысь Кызыл-Яр гуртысь «Марӟан» но Янаул ёросысь Вуж Варяш гуртысь «Югдон». 3-тӥ интыез но жюри одӥгезлы гинэ сётыны ӧз быгаты — сокем синмаськымон кырӟазы-эктӥзы. Башкортостанысь Татышлы ёросысь Вязовка гуртысь «Уӵы ныл», Татарстанысь Кукмор ёросысь «Сактон» но Марий Элысь Мари-Турек ёросысь Карлыган гуртысь «Ӟардон». Нош фестивальлэсь Гран-призэ басьтӥзы куно пумитасьёс — Башкортостанысь Татышлы ёросысь Выль Татышлы гуртысь «Шулдыр ӝыт» ансамбль. Вормисе потэмъёс пусъемын дипломъёсын но синпель кузьымъёсын.
Кырӟаса-вераса гинэ ӧз ортчы «Дуно марӟанъёс» фестиваль.
— Ваньмы огазе люкаськимы бере, удмурт огазеяськонъёсмы азьын сылӥсь ужпумъёсты но сэрттоно-пертчоно кариськимы. Отчы удмуртлыкен вырись адямиос гинэ ӧвӧл, гурт поселениослэн йыръёссы но, культура удысын тыршисьёс но, дышетӥсьёс но пыриськизы, — мылкыдзэ вера Татарстанысь удмуртъёслэн автономизылэн кивалтӥсезлэн юрттӥсез Марина Иванова. — Котрес ӝӧк сьӧры пуксьыса, ог-огмылы ивортӥмы: кыӵе амалъёс юртто удмуртъёсты эшшо но золгес огазеяны, улосъёсамы удмуртлыкез утьыны но азинтыны. Мон, кылсярысь, туж вожъяськисько Башкортостанын удмурт пиналъёс понна радъяськись «Усточикар» лагерьлы. Жаляса верано, милям таӵеез ӧвӧл на. Но тэк пукыны ми дышемын ӧвӧл. Озьы мукет улосъёсысь бускельёсынымы кенешыса, «Мон — удмурт» проектмы кисьмаз. Сое рос-прос радъян бордын али тырше автономимы бордын кылдытэм егитъёслэн огазеяськонзылэн азьветлӥсез Анна Самсонова. Проектмы улсын огазеяны быгатомы улосысьтымы удмурт егитъёсты. Шӧдӥ ни: «Дуно марӟанъёс» фестиваль кадь улоскуспо ужрадъёсын йырын чилекто пайдаё малпанъёс. Котьку та ужрад вунонтэм но туж шулдыр ортче, но тужгес дуноез — удмуртъёсты огазея но выжыосмес утьыны юрттэ.