Дом Дружбы народов

    Кылбурчи Богдан Анфиногенов дасяське 2-тӥ кылбур бичетсэ поттыны

    Кылбурчи богдан анфиногенов дасяське 2-тӥ кылбур бичетсэ поттыны 1

    «Ӝикъя Промо» книгае 2015-тӥ-2022-тӥ аръёсы гожтэм удмурт но ӟуч кылбуръёсыз пырозы.

    Богданлэн нырысетӥ бичетэз — «Айшет будущего» — 2014-тӥ арын улонэз адӟиз.

    — Со дырысен 9 ар ортчиз ни, соин ик улонэлэн но творчествоелэн оглюкетсылы выль книгаен пичи йылпумъянъёс лэсьтэме потӥз, — вераз Богдан, — «Ӝикъя Промо» бичетэ пырем кылбуръёс пӧлысь куд-огез печатласькизы ни «Ингож», «Туала удмурт поэзия» альманахъёсын, «Инвожо» журналын, «Удмурт дунне» газетын, потазы «ВКонтакте» бамын, нош кудогъёссэ лыдӟись нырысьсэ дунъяны быгатоз.

    Бичет бордын Богдан эшъёсыныз ӵош ужаз. Дизайнер Марина Степанова книгалэсь туссэ дасяз, тупась туспуктэмъёс бырйиз. «Кенеш» журналлэн редакторез, кылбурчи Анастасия Шумилова дась макетъёсты кутсконысеныз пумозяз лыдӟиз, тупатъяз.

    — Мынам кемалась потэ ни вал пичи гинэ кие кутымон книга поттэме, адӟисько вал сое рекламной буклетэз выллем. Тани бадӟым магазинъёс асьсэлэсь вузъёссэс возьматон понна басьяськисьёслы журналъёс, листовкаос люкыло. Со выллем ик аслэсьтым бичетме но лэсьтэме потэ вал. Малпанэ пумозяз ӧз ке но быдэсмы, вераны быгатӥсько: ужмы туж яркыт, адӟымон пӧрмиз, — вераз Богдан.

    Книгалы ним сётӥз кылбуръёс пӧлысь тужгес но золэз.

    — «Ӝикъя Промо» ним туж тупа «Айшет будущего» нимлы. Та кылтэчетъёс шоры пӧртэм сямен учкыны луэ. Соос этнофутуризм шӧмо чузъясько.

    Оглом Богдан 100 экземпляр бичет поттыны дасяське. Оске, ужзэ йылаз-пумаз вуттыны «ВКонтакте» социальной сетьын пукисьёс но юрттозы шуыса. «Айшет будущего» бичетсэ дасякуз ик, Богдан туала улонын вӧлмем краудфандинг амалэз кутӥз вал. Соку вань мылкыд карисьёс «Зэмос кылбур веме» акция улсын книга поттон понна кин кӧня быгатэ коньдон келязы. Таяз радэ но вань мылкыд карисьёс быгато Богданлы кӧня ке юрттыны. Со понна кылбурчи книгазэ кузьмалоз.