«КЫЛ КУАЗЬ» — удмурт гожъяськонэз утёнъя но азинтонъя проект
«КЫЛ КУАЗЬ» проект кылдытэмын удмурт кылэз утён но азинтон вылысь. Со улсын Элькунамы улӥсьёс шаертодонъя но анай кылын литература сярысь тодон-валанъёссэс муромытыны но ёросъёсысь творческой калыкен тодматскыны быгатозы. Ужӵектослэн мукет ужпумез — удмурт сямен гожъяськонэз но лыдӟиськонэз вӧлмытон.
Пуктэм малпанъёссэс улонэ пыӵатыса, 19-тӥ гудырикошконысен толэзь ӵоже проектэз радъясьёс удмурт кылбурчиосын но артистъёсын уйпал ёросъёсы потазы: Шаркан, Глаз, Балезино, Дэбес но мукет.
«Азьпалан котырес ӝӧк сьӧрын люкаськыны чакласьком, удмурт литератураез вӧлмытонэн герӟаськем юанъёсты эскерон вылысь – шуиз ужӵектослэн координаторез Алексей Пономарёв. Нош шуркынмонысен ини выльысь ёросъёсы поталом. Тросгес саклык висъялом табере гуртъёслы. Отын сыӵе югдур – калык туж ӧжыт тодэ асьме удмурт гожъясьёсмы сярысь».