Кыккылолыко нылпиос понна «Нуныкай» центр усьтӥськоз Ижкарын куарусёнэ
Кык кылэз тодӥсь нылъёс но пиос «Нуныкай» центрын пӧртэм шудонъёс но киужен вырон улсын удмурт кылын вераськыны быгатэмзэс волятозы, кылтӥрлыксэс узырмытозы. Пумиськонъёс котькуд кӧснуналэ 11 часысен «Сёма» центрын ортчылозы, со интыяськемын Ижкарысь Карл Маркс нимо урамысь 395 номеро юртын. Ӵектос ужалоз ар пумозь.
Выль ӵектос каръёсын удмурт кылэз утёнлы, но азинтонлы сӥземын. Котькуд пумиськон-дышетскон пиналъёслэсь арлыдзэс лыдэ басьтыса радъяськоз. 2-ысен 4 аресозь но 5-ысен 9 аресозь пиналъёс пӧртэм группаосын ужалозы. Дышетӥсьёс-педагогъёс: крезьгуръя — Ходырева Марина Германовна, вераськон кылэз волятонъя — филологи тодосъя кандидат Волкова Татьяна Геннадьевна, творчествоя занятиос — Бикузина Ольга Анатольевна. Дышетсконъёс вискын нылпиосын шудонъёс ортчытъялоз Фролова Елена Григорьевна.
«Нуныкайлэн» нырысетӥ пумиськонэз ортчоз 26-тӥ гудырикошконэ Ижкарысь Кызьпу арамаын 11 часысен. Отын дышетӥсьёсын но центрлэн ужан аспӧртэмлыкеныз тодматскыны луоз.
«Каръёсын улӥсь удмурт семьяослы анай кылзэс утён секыт сётӥське. Пиналъёс понна пумиськонъёс, кытын соос быгато ваче тодматскыса удмурт кылын вераськыны, туж ӧжыт. Туннэ таӵе пумиськонъёсты кыккылолыкъя «Билингва» центр но «Анай клуб» огазеяськон гинэ радъяло», — пусъё «Нуныкай» ӵектосэз кылдытӥсьёс.
Ватсаломы, «Нуныкай» ӵектосэз кылдытонлы мылкыд сётӥз «Удмурт Кенеш» огазеяськон. Ижкарлэн мерлыко ӵектосъёсъя конкурсаз пыриськыса, кичӧлтонэз быдэстыны 100 сюрс манет утыны кылдӥз.