Кык кылолыкъя семинар ортчиз 2-тӥ инвожое

Семинарлэн модераторъёссы – психолог Ольга Смирнова но педагоги тодосъёсъя доктор, профессор Ирина Ворожцова – ӵектӥзы таяз радэ семья куспын кыл герӟетъёс пумысен кенешыны.

Ужрад ортчиз вераськонъя шудон амалэн. Анай-атайёслы сётэмын вал луонлык вераськон кусыпъёсты улонын кутыны быгатэмзэс эскерыны. «Со лэсьтӥське анай-атайёс мед валалозы шуыса – пиналлы пӧртэм югдуре пӧртэм сямен вазиськыны кулэ, кылъёсты пыр-поч быръёно, – вера психолог Ольга Смирнова. – Таӵе ужан амалъёслы луыса анай-атайёс валало, вераськонъя кыӵе шуг-секытъёссы сооослэн вань но кызьы соосты палэнтоно, кызьы асьсэлы вокабулярез азинтоно».

Анай-атайёс сяна, ужрадэ пыриськизы кык кылын вераськись пиналъёсын ужась нылпи садъёсысь ӧнерчиос но. Людмила Бакулева Ижкарысь 195 номеро нылпи садын удмурт кылъя кружок нуэ. «Мон трос кылылӥ ни вал #Билингвасеминаръёс сярысь, туннэ нош нырысьсэ лыктӥ, — мылкыдзэ шарая Людмила Бакулева. – Семинарын тодматэм амалъёсты туж пайдаё луысал, дыр, ужын но кутыны».

Семинар мынон вакытэ #Нуныкай центрысь ӧнерчиос пиналъёс понна дышетонъя но шудонъя площадка радъязы. Нош ужрадлэн кыкетӥ люкетаз – бадӟымъёс но пиналъёс но – нылпиосты утён Нуналлы сӥзем праздник пусъёнэ пыриськизы. Тодмо выжыкылъёсысь геройёс пӧртэм вожвылъяськонъёс ортчытӥзы, удмурт эктонъёсты но шудонъёсты дышетӥзы. «Нуныкай» центр улсын ужась театръя студие ветлись покчиос «Репка» выжыкыл пуктӥзы — удмурт кылын, туала шӧмын. «Пиналъёс туж тулкымъяськизы, озьы ке но туннэ туж яркыт но быгатыса шудӥзы», — вера пинал актрисалэн Даша Михайловалэн анаез. – Туж шумпотӥсько, грант утэм чотын театръя студиын дышетскыны кылдӥз шуыса. Пинал татын творчествоя быгатонлыкъёссэ но волятэ, удмурт кылзэ но юнматэ.

Праздникын озьы ик конкурсъёсын вормисьёсты данъязы – «Вить дуно кылъёс но «Билингва-TV». Вожвылъяськонэ пыриськись котькуд пинал сертификатэн пусъемын вал, тужгес устоосыз «Билингва» ӵектослэсь но Элькунысь йӧскалык политикая министерстволэсь нимысьтыз кузьымъёс утӥзы.

Вормисе потэмъёс пӧлын – Пичи Пурга ёросысь Аксакшур нылпи садысь покчиос. «Ми тыршиськом пӧртэм конкурсъёсы пыриськыны – вера воспитатель Надежда Бектуганова. – Но таӵе ужрадын, кудӥз ортче Ижкарын но быдэсак удмурт кылын – нырысьсэ. Пиналъёсын ӵош вуизы анай-атайёссы но. Соос понна но данъянъёс дуно сыло».

Тодады вайытом, «Удмурт кенеш» огазеяськонлэн «Билингва. О практиках формирования двуязычия в современной городской среде» ӵектосэз миым Азьмурт грантъёсъя Фондэн #ФондПрезидентскихГрантов ялэм вожвылъяськонын вормисе потӥз. Грант чотын туэ кык кылолыкъя 5 семинар ортчытэмын ини.