Кык команда пыриськиз «Шудком» визьбурлыко шудонлэн нырысетӥ пумиськоназ Балезино ёросын
Шудонэ пыриськисьёслы 27 юанлы валэктон сётӥзы. Соос пӧртэм удысъёсысь вал, со пӧлын суредан искусство, история, кино, спорт но мукетыз. Ӟырдыт нюръяськонын вормизы «Визьпогъёс». Команда валтӥсь кузьымлы одӥг вамышлы матынгес луиз. Кубокез нырысетӥ сезонын тужгес трос пол вормем команда басьтоз.
Балезино ёросын удмурт кылын визьбур шудонэз егитъёслэн «Шунды» огазеяськонзылэн ёросысь ёзэтэз радъяз.
Тодэ вайытом, «Шудком» — «Что? Где? Когда?» но «60 секунд» выллем шудон. Удмуртиын ӵектос 2016-тӥ арын кутскиз. Ижкарын радъяськись пумиськонъёсы пали 20-лэсь ятыр командаос пырисько ни. «Шудком» удмурт визьбур клублэсь валтӥсь кузьымзэ бӧрсьысь кык ар «Валамон-Паримон» команда утӥз.
Ватсалом, «Шудком» шудонъёс Пичи Пурга но Кияса ёросъёсын ортчыло ни.