Кык бадӟым нылпи фестивальёс ортчо та нуналъёсы Удмуртиын
![Кык бадӟым нылпи фестивальёс ортчо та нуналъёсы удмуртиын 1](https://udmddn.ru/wp-content/uploads/2019/05/kjlo.jpg)
Нылпиосты утён нунал азьын Удмуртие шаермылэн пӧртэм сэрегъёсысьтыз но бускель улосвылъёсысь огъя 15 нылпи театръёс анай кылын спектакльёссэс возьматозы.
Учкисьёс тодматскозы Башкортостанысь, Татарстанысь, Марий Элысь, Удмуртиысь – Ижкарысь, Дэри, Шаркан, Кез ёросъёсысь, Можга, Вотка но Сарапул каръёсысь — коллективъёсын. Постановкаос удмурт, ӟуч, пор, башкир кылъёсын мынозы. Фестивале пыриськозы 6 аресысен 25 аресозь 320 пала нылпиос. Конкурс йылпумъяськоз 1-тӥ инвожое бадӟым концертэн Горький нимо гужем садын.
Туннэ ужзэ мытоз «Гуждор» фольклор нылпи фестиваль. Шаерысьтымы но бускель улосвылъёсысь люкаськем пинал усточиос ас палъёсысьтызы калык кырӟан-веранъёсты, шудон-эктонъёсты, сям-йылолъёсты возьматозы.
Вераны кулэ, та фестиваль шаерамы 5-тӥзэ радъяське. Арлы быдэ — пӧртэм ёросъёсысь чебер интыосын. Туэ 7 аресысен 17 аресозь пинал куноосты пумиталоз этнография но архитектурая Лудорвай музей-заповедник.