Кыӵе ужрадъёс пырозы АФУН-лэн планаз

Россиысь финн-угор калыкъёслэн ассоциацизылэн ужан планаз Удмурт Элькунысь ӵектонъёсты пыртон пумысен кенешон ортчиз Ижкарысь калыкъёслэн эшъяськон юртазы. Ужрадэз нуиз «Удмурт Кенеш» огазеяськонлэн Тӧроез, АФУН-лэн кивалтӥсезлэн воштӥсез Татьяна Ишматова.

Кенешонэ люкаськизы удмурт мер огазеяськонъёслэн ёзчиоссы но кивалтӥсьёссы: дышетон, лулчеберет удысын ужасьёс, журналистъёс, егитъёс, озьы ик мордва но пор калыкъёслэн огазеяськонъёссылэн кивалтӥсьёссы.

Кызьы пусйиз Татьяна Ишматова, кылем аре Саранскын ортчем АФУН-лэн съездаз кутэмын вал ньыль секциосъя резолюция. Соин ик ужан планэз но соя тупатӥзы.

Пумиськон улсын дэмламын вал нимысьтыз ужрадъёс но, финн-угор калыкъёсты огазеясь пӧртэм форумъёс, дышетонъя семинаръёс, марафонъёс, праздникъёс но.