Кузонын Татарстанысь удмуртъёслэн йӧскалык лулчеберетъя автомизылэн кенешез ортче

Ужрадэ пырисько 11 ёрос ёзъёсысь 41 делегатъёс, — со Кукмор, Балтаси, Бавлы, Агрыз, Менделеевск, Елабуга, Мамадыш, Бугульма, Сабин, Зеленодольск ёросъёсысь но Кузонысь удмуртъёс.  Ӧтем куноос пӧлын  Удмуртиысь йӧскалык политикая министр Лариса Буранова, Кун Кенешысь ялан ужась ӧрилэн кивалтӥсез , «Удмурт Кенеш» огазеяськонлэн тӧроез Татьяна Ишматова, Татарстанлэн Президентэз бордын ужась департаментысь йӧскалык политикая управленилэн кивалтӥсез Данил Мустафин, Казаньысь Эшьяськон юртлэн кивалтӥсез Ирек Шарипов.

Татарстанысь удмуртъёслэн автономизы 15 ар ужа ни. Нош 10 ар талэсь азьло кылдытӥзы егитъёслэсь ёззэс. Трос гинэ ужрадъёс ортчытэмын 3 ар куспын. Бадӟым уж нуиське егитъёс, пиналъёс пӧлын.

Бигер шаерысь удмурт азьветлӥсьёс кылем арын гинэ 38 ужрад ортчытӥзы. Кызьы пусйиз Данил Мустафин, удмуртьёс быгато валче, эшьяськыса улыны, сюлмысь тыршыны. Татарстанысь гурт удысысь тужгес усто хозяйствоосын,  кылсярысь,  удмуртьёс кивалто.