Кузебай Герд но Можга педтехникум (педколледж)

Фасад Можгинского педагогического колледжа

Можгаысь Трокай Борисов нимо педколледжысь удмурт кылъя но сое дышетон методикая дышетӥсьлэн Т.С. Ивановалэн докладэз, “Герд лыдӟонъёс-2019”

Кузебай Герд дано Можга педтехникумын ӧз ке но дышетскы, ӧз ке но ужа, адӟиськисьтэм уно нюжаосын со соин герӟаськемын. Туннэ мынам кӧня ке сыӵе гердъёс сярысь вераме потэ.

Можга карысь Трокай Борисов нимо дышетӥсьёсты дасянъя колледж кемалась дырысен удмурт кадыръёсты будэтонъя «кебитэн» лыдъяське. 100 ар ни татын дасяло покчи классъёслы удмурт дышетӥсьёсты. Та дышетсконни меӵак герӟаськемын Россиысь удмуртъёслэн нырысетӥ ӧтчаменызы. Татын уно юанъёс пӧлын эскеремын вал удмурт школаос усьтон сярысь но отын ужаны дышетӥсьёсты дасян сярысь.

Тае лыдэ басьтыса, 1918-тӥ арын удмурт калыклэн дано пиосыз Максим Прокопьев (дышетӥсь), Кузьма Чайников (дышетӥсь), Трофим Борисов (эмчи) кутско дышетӥсьёсты дасян семинария кылдытон борды.

Кык интыын – Елабугаын но Выль Мултанын – усьтӥськизы сыӵе дышетон интыос. Трокай Борисов кивалтэм улсын – Елабугаын, нош Кузьма Чайников тыршемен – Выль Мултанын. (Туж жаль Выль Мултанын семинария кема ӧз ужа шуыса).

Удмурт калыклэн дано пиосыз Трокай Борисов но Кузьма Чайников тупаса, ог-огзэс валаса пӧртэм удысъёсын ужазы. Но выль удысын но – дышетсконниосты кылдытонын – уно вал, дыр, вераськонъёссы, сюлэмшугъяськонъёссы, куректонъёссы но шумпотонъёссы. Та кык адямиослэн кусыпъёссы сярысь уно вераськылэмын ини, соин ик та сярысь мон уг вераськы. Кӧня ке верало мукет гердъёс сярысь.

Кузебай Герд одӥг пол гинэ вуылэ Можга педтехникуме. Но та пумиськон уноезлы дышетӥсьёслы но, дышетскисьёслы но кема аръёс ӵоже ӟеч малпанъёсын сюлэмазы кылёз.

Игнатий Гаврилов «Тодам ваисько» книгаяз таӵе чуръёсын гожтэ Кузебай Гердэн пумиськон сярысь: « Ӝоген Кузьма Павлович Чайников ачиз Можга педтехникуме вуиз. Со вал 1926 арын толалтэ. Кузебай Герд соку быдэс республикаын тодмо поэт вал ни. «Крезьчи», «Шуныт зор» но мукет книгаоссэ ми яратыса лыдӟылӥм.

Педтехникуме со ӝытпал гинэ вуиз. Мугорын таза, дӥсяськемын ӝикыт но тузӥ: йыраз лызалэс-пурысь лусьтро кепка, векчи демисезонной сьӧд пальто, пыдъёсаз ӵуж ботинкаос, соос вылын чилясь выль калошаос.

Кошовкаысь васькыса гинэ вуттӥз, сое дышетӥсьёс но пиналъёс котыртӥзы. Кузебай Герд шулдыр мылкыдо вылэм. Вера, юалляське, малы ке паймыса чапкиськылэ, серекъя. Куараез векчи, нылкышнолэн кадь».

Со ӝытэ Кузьма Павлович кык часлэсь кема вераз залэ люкаськемъёслы этнографической экспедицие Карлыган пала ветлэмез сярысь. Перерыв бере Герд туж быгатыса лыдӟиз аслэсьтыз кылбуръёссэ. Берлогес вераськиз литературной ужпумъёс сярысь, кылбуран сямъёсыз сярысь. Егит гожъясьёслэсь сюлэмзэс ик бугыртӥз.

Кузебай Гердлэн Можга педтехникуме ветлэмез сярысь Пётр Кубашев но вералоз «Удалтэм аръёс» документально-художественной повестяз Екатерина Алексеевна Коноваловалэн синъёсыныз. (Азьланяз куамын арлэсь кема со тыршиз педучилищеын, удмурт кылъя но литературая дышетӥсь луыса, со – Удмурт Республикаысь сиё-дано дышетӥсь. Михаил Коновалов писательлэн апаез).

«…Катя Коновалова, вазь ик лыктыса, самой азьысь радэ интыяськиз. Кыӵе меда со Кузебай Герд?… Поэтъёс таӵе ик адямиос меда?» … Учке: сцена вылэ потэ Катялы туж тодмо адями Кузьма Павлович Чайников. Бен со Ижевскысь приютэ басьтыса утиз вал уго Катялэсь пичи сузэръёссэ, ассэ но Катяез отчы ик ужаны интыяз. … «Чайников – Кузебай Герд» кылъёсты кылыса, Катялэн син азьыз ик пеймыт луиз: Кузебай Герд поэтэн артэ ужаськем вылэм ук!»

Та ӝытэз быгатыса нуизы соку куинетӥ курсын дышетскисьёс Анна но Гриша Медведевъёс (азьланяз тодмо гожъяськись Григорий Сергеевич Медведев).

«…Со куспын Гриша Медведев выллане сынам чогырес горд йырсизэ маялтӥз но вераны ӧдъяз:

– Кузьма Павловичен ми, Татариысь дышетскыны лыктэмъёс, кыкетӥзэ пумиськиськом ни. Нырысь радаз со ачиз Ципьяе ветлӥз, та селоысь художественной коллективен уно гуртъёсысь калыкез паймытъяз. Ми доры но, Лызяе, (1919 арын январь толэзе) вуылӥзы. Тани али кыкетӥзэ пумиськиськомы, та радаз Кузебай Герд поэтэн. Соку, поэт шуыса, ми кадь ашыкъёс тодӥськомы вал шат!»

Та пумиськон сярысь ик тодаз вае журналист но поэт Игнатий Аверкиевич Курбатов допрос дыръя гожтэмаз : « Это было в 1926 году весной. Он в педтехникуме проводил литературный вечер, где предложил выступись и мне со своим произведением. Я это сделал с большим удовольствием. Герд на этом же вечере о моём произведении дал довольно лестный отзыв, что меня подбодрило и поднял мой авторитет перед всеми учащимися. После этого я начал работать ещё с большим энтузиазмом…Я считал себя неограниченно счастливым человеком этим знакомством»….

И. Курбатовлэн кылбуръёсызлэн шорсюлэмзы луэ инкуазь, крестьян уж, выль техникалэн вуэмез но гуртлэн тусбуйзэ воштэмез. Гожъя со кыӵе ке паймымон шуныт, яратӥсь мылкыдын.

«Аслаз настроениосызъя, литература шоры учконъёсызъя И.Курбатов матын вал Кузебай Гердлы», – пусъе удмурт литератураез эскерись Александр Шкляев.

Туннэ вератэк кельтыны уг яра Кузебай Гердлэн но Иван Бурдюковлэн кусыпъёссы сярысь. Гурт калыклэсь курадӟыса но сютэм улэмзэ адӟыса, Бурдюков юн малпаськыны кутскем. Крестьян калыклы дурбасьтыса, со педучилищеын дышетскисьёс пӧлын ӵем вераськылэм. 1925 арын Вавож селоын ужакуз, со трос шуг-секытъёсын пумиськем. 1926 арын март толэзе та селое вуылэм Кузебай Герд. Бурдюков со доры ачиз мынэм. Часлэсь кема вераськиллям. Бурдюковлы дурбасьтыса, Кузебай Герд калык азьын вераськылэм. «Софин» делоысь материалъёсъя, Иван Бурдюков Советской властьлы но партилы, оглом вераса, дурдасьтэ, но, котькуд крестьян пи кадь, нокызьы уг вала, малы музъем ужасьёсты зӥбо, трос налог тырыто, колхозъёсы кужмысь пырто, Сибире келяло.

Кык удмуртъёсты Кузебай Гердэз но Иван Бурдюковез 1933 арын 9 июле ОГПУ-лэн Коллегиез ыбыны пуктӥз вал. Кӧня ке улыса, 4 ноябре, ыбонэз 10 арлы лагерьёсы келянэн воштӥзы. 1937 арозь Соловки шормуӵын пукизы, ӵош улӥзы. Ноябрь толэзе кыксэс ик ыбизы.

Кузебай Гердлэн тужгес ик ӟеч кусыпъёсыз вал удмурт советской литаратура кылдон но быдэ вуон вакытысь тодмо дрататурген, кылбурчиен, прозаикен Михаил Николаевич Тимашев. Соос ог-огзылы гожтэтъёс но гожъязы. Кӧныез ке соос шедьтэмын но печатламын Кузебай Гердлэн 6 томъем бичетаз. Ма сярысь гожтэ Кузебай Герд? Гожтэтъёсысь кӧня ке люкетъссэ лыдӟо:

– «Тынад удмурт театр бордын ужамедлы мон туж шумпотӥсько – ужед ялан чеберомыса, ялан паськытомыса азьлань мед кошкоз»;

– «Удмурт литература но кырӟанъёс бордын ужамед ушъямон. Только, кырӟанъёсты бичакуд, кызьы кулэ, озьы гожтылыны туртты. Кулэтэм сямъёсын ке гожтылӥд, вань ужам ужед токма гинэ луоз».

– «Удмурт театрез, удмурт культураез, удмурт устолыкез вылэ ӝутон, вань калыклы ушъяськыса верамон карон – со асьмелэн нырысетӥ бадӟым ужмы»;

– «Удмурт культура котырын ужасьёсты ваньзэс огинэ герӟаны кулэ, дэрие сапкытыны сётыны кулэ ӧвӧл»;

– «Удмурт клублы та вадес ик куткыны кулэ вылэм ини тани таӵе уж сярысь сюлмаськыны. 2-3 ар улыса, Удмурт улослэн улэм-вылэмез дас ар тырмоз ини. Со асьмелэн туж бадӟым праздникмы луоз. Со празднике асьмелы итог лэсьтыны кулэ луоз: мар асьмеос ужам, мар быгатӥм лэсьтыны, мар ӧм быгатэ?»

Та вакытэ Кузебай Гердэз сюлэмшугъяськытӥзы таӵе юанъёс:

– «Удмурт куспын ваче тэргаськон сярысь уно уг гожты. Со сярысь гожтэтлы быдэ удмуртъёс ваче иворъясько, тэргаськемысь дугдоно ини шуыса кесясько но, пайдаез уг адӟиськы».

Тани вакчияк гинэ Кузебай Гердлэн Можга педтехникумлэн гердъёсыз сярысь. Та юан быдэсак эскеремын ӧвӧл на. Но одӥгзэ юн валасько: вуоно гожъяськисьёсты будэтонын Гердэн пумиськон аслэсьтыз емышсэ сётӥз.

Контентмейкер, мемолог и журналист

Дом Дружбы народов
Добавить комментарий