Кун кенешын кун йӧскалык политикалэсь улонэ пыӵамзэ эскеризы

Солэн ужаз пыриськизы Россиысь Кун Думаысь депутат Алексей Загребин, йӧскалык политикая министр Лариса Буранова, Калыкъёслэн Эшъяськон юртэнызы кивалтӥсь Татьяна Боталова но йӧскалык лулчеберетъя огазеяськонъёслэн кивалтӥсьёссы.

Кенешонэз усьтыса, Татьяна Ишматова матэктӥсь калыкъёслэн огазеяськон нуналэнызы но Удмуртилэн кунлык басьтэм нуналэныз ӟечкылаз но вань йӧскалык огазеяськонъёсты шаермылэн кунлык басьтэм нуналэзлы 100 ар тырмонэн валче пусъем ужрадъёсы мыло-кыдо пыриськыны куиз.

Татьяна Ишматова но Алексей Загребин люкаськемъёс азьын нимысьтыз саклык висъязы туэ 26-тӥ коньывуонэ Ханты-Мансийскын ортчем Президент бордын ужась йӧскалык кусыпъёсъя Росси Федерацилэн кенешонэзлы.

Отын Владимир Путин кивалтэм улсын кун йӧскалык политикаын валтӥсь ужпумъёс сярысь вераськон мынӥз — йӧскалык кусыпъёс, выжы калыкъёслэсь кылъёссэс утён вылэ кунлэн паськытамезлэн но демографиезлэн азинскемъёссылэн пытьыез.

Соку ик Росси Президент «О создании Фонда сохранения и изучения родных языков народов Российской Федерации» сярысь указ гожтӥз.

Котырес ӝӧк сьӧрын люкаськем НКО-лэн кивалтисьёссы кун политикалэн улонэ пыӵамез, кылъёсты дышетон пумысен асьсэ учконзы сярысь веразы, со сяна иворез вӧлмытон сознэтъёсын огазеяськонъёссылэн ужамзы сярысь ивортонъёс дасянэ, грантъёсъя программаосы пыриськемазы но проектъёссэс радъянын Удмуртиысь тӧрлыклэн, мерлыко палаталэн пыриськемзы сярысь веразы.

Вань ӵктон-дэмланъёсты Кун кенешысь наукая, дышетонъя, лулчеберетъя, йӧскалык но егитъёсын ужан политикая ялан ужась ӧриын санэ басьтӥзы.