Куинь сюрслэсь ятыр адями пыриськиз Можгаын «Выль» шулдыръяськонэ
Туэ «Выль» шулдыръяськон Можгаын 16-тӥзэ ортчиз ини. Со сяна, ньылетӥ арзэ гурт возёс вузъёсын ярмарка сямен радъяськиз.
«Ми ужаськом ӟечлыкез бордын, тросгес пыриськисьёс мед лыктозы ярмаркаямы, урамъёсамы шуыса: Чорыг ураме, Йӧл ураме, Сӥль ураме, Чечы ураме, Емыш ураме, Нянь ураме», — вера Эдуард Петров, «Удмурт Кенешлэн» Можга ёросысь ёзэтэзлэн тӧроез.
Ужрадэ быдэс Удмуртиысь, озьы ик Татарстанысь куноос вуылӥзы. Со сяна, ужрадэ Удмуртиысь йӧскалык политикая министр Лариса Буранова, Кун Кенешысь депутат, Вань удмуртъёслэн «Удмурт Кенеш» огазеяськонзылэн тӧроез Татьяна Ишматова, огазеяськонлэн Экспертно-консультативной кенешезлэн кивалтӥсез Игорь Семёнов, Можга карысь но ёросысь кивалтӥсьёс пыриськизы.
Эдуард Петровлэн верамезъя, шулдыръяськон улсын пӧртэм арлыдо адямиослы трос пӧртэм площадкаос ужазы. Кылсярысь, семьяосты но пиналъёсты «Кӧжыпогъёс», «Быгылес сяртчыос», «Быдэ вуон» площадкаосын возьмазы. Батыр воргоронъёс «Выль кужым» вожвылъяськонэ пыриськизы, 10 арлэсь кема ӵошен улэм етӥз семьяос – «Азвесь сюрло» ӵошатсконэ. Озьы ик пӧртэм мастер-классъёс, адӟытонъёс ортчизы.
Можгаысь но ёросысь творчествоя коллективъёс шуныт мылкыдзэс кузьмазы.
«Валтӥсез – «Выль гуртмы» – валтӥсь сценамы, отын творчествоя номеръёс, концерт программаос ужазы», — шуэ Эдуард Петров.
Шулдыръяськонлы яркыт йылпумъян «Эктоника» ӵектос лэсьтӥз.