Куать ӧръёсъя площадкаос ужалозы «Окно в небо» калыккуспо фестивальын Удмуртиын

Азьвыл аръёсы Дмитрий Зеленин нимо фестиваль фольклоръя ужрадэн лыдъяське вал, нош туэ радъясьёс сое паськытатыны малпазы. Табере ужрад калык творчествоя фестивален ялэмын но отчы пӧртэм творчествоен огазеям адямиос люкаськыны быгатозы.

«Окно в небо» фестивальлэн площадкаосыз:

  1. Фольклоръя «Калыклэсь сям-йылолъёссэ утиськом»;
  2. Шаертодосчиослы «Мифъёс, выжыкылъёс но легендаос»;
  3. Егитъёслы «Красавица в стиле ЭТНО»;
  4. Гожъясьёслы «Зеленин лыдӟонъёс»;
  5. Театр площадка;
  6. Пужыятэм киужъёсын «Шерстяная сказка» адӟытон-вузкарон.

Дэри ёрос администрациысь Лулчеберетъя, спортъя но егитъёсын ужан политикая управленилэн кивалтӥсез Светлана Мельчикова верамъя, ужрадлэн валтӥсь куронэз — «учкись понна ӧвӧл, калыкен ӵошен». Соин ик фестивальын трос интерактивной вӧлметъёс ужалозы.

“Милям фестивальмылэсь монетазэ дурыны луоз, пукыӵысь ыбылӥськыны но веник керттыны дышетскыны, аслэсьтыд кылбурдэ лыдӟыны, эктыны, кырӟаны но театр быгатонлыктэ возьматыны луоз”, – шуиз Светлана Мельчикова.

Радъясьёс малпамъя, «Окно в небо» фестиваль-конкурслэн тужгес яркыт ужрадъёсыз пӧлын: 6-тӥ пӧсьтолэзе фестивалез сӥё-дано усьтон, 7-тӥ пӧсьтолэзе Дмитрий Зеленинлэн вордскем гуртаз — Люк черкогуртын — радъяськоно праздник, Дэриын ортчоно бадӟым гала-концерт но «Красавица в стиле ЭТНО» вожвылъяськон-шоу.

Кызьы шуиз фестивальлэн кивалтӥсез Марсель Мухаметшин, вань ужрадъёсы пыриськон дунтэк луоз. Таяз арын фестивальлэн хедлайнеръёсыз интые Удмурт Элькунысь фольклор кырӟанъя но эктонъя «Айкай» кун театр, «Брангуртысь песянайёс» коллектив но Москваысь «Поверье» фолк-группа ӧтемын.

Озьы ик Марсель Мухаметшин «Окно в небо» сярысь вань ивортодэт вотэсын луоз шуыса пусйиз, малы ке шуоно Дэри ёросэ Москваысь но Удмуртиысь блогеръёс лыктозы. Со сяна, фестивалез усьтон но ворсан ужрадъёсты интернетын меӵак эфирын возьматозы.

Туннэ нуналлы «Окно в небо» укмысэтӥ калыккуспо фестиваль-вожвылъяськонэ пыриськыны 550 пала адями куриськиз ни. Соос пӧлын Россиысь 20-лэсь ятыр улосвылъёсысь, Эстониысь, Финляндиысь но Казахстанысь мылкыд карисьёс. Озьы ик Венгриысь но Армениысь куноос лыктыны быгатозы.

Тодэ вайытом, фестиваль улсын радъяськись «Красавица в стиле ЭТНО» конкурслэн йылпумъян люкетаз Удмуртиысь, Мордовиысь, Ямало-Ненец округысь, Омск, Челябинск, Белгород улосвылъёсысь, Коми но Карелия Элькунъёсысь 14 нылашъёс потӥзы.

ВАТСАН

Калык творчествоя Д. К. Зеленин нимо укмысэтӥез «Окно в небо» калыккуспо фестиваль-конкурс тодмо ӟуч тодосчилэн, фольклористлэн Дмитрий Зеленинлэн вордскем шаераз Дэри ёросын 2018-тӥ арын 5–8 пӧсьтолэзе ортчоз. Ужрадлэн темаез: «Сказки разные — мудрость народная». Фестиваль Россилэн азьмуртэзлэсь грантсэ утӥз но Удмуртиысь ужрад туризмъя дырпусэ пыриз.

Нялтас вераса, туэ гужем Удмуртиын фольклоръя даслэсь ятыр фестивальёс ортчозы.

https://udmurt.media/udm/news/kultura-i-turizm/37492/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий