«Куара» огазеяськонысь егитъёс Удмуртилэн Тӧроеныз пумиськылӥзы
Туэ огазеяськонлы 4 ар тырме. Егитъёс удмурт кылэз, лулчеберетэз азинтон понна видеоос лэсьяло. Та дыр ӵоже проектъёссэс улонэ пыӵатон понна соос пӧртэм фондъёсысь 3 миллион манет пала грантъёс утӥзы ни.
Али егитъёс «Айшон» проект бордын ужало. Со улсын удмурт калык дӥськут сярысь видеоос пӧрмиз ни. Огазеяськонлэн кивалтӥсез Владислав Степанов ӵектӥз соосты Ижысь аэропортын, вокзалын возьматъяны. Тӧро та малпанлы дурбасьтӥз.
— Туж потэ билингвъёсты — кык кылын вераськись пиналъёсты — будэтыны юрттӥсь «Аныкай» центрез усьтэммы, — вераз «Куара» огазеяськонын проектъёсын ужась менеджер Ольга Степанова. — 3 ар талэсь азьло пимы вордскиз но, ми валамы, Ижкарын нылпиенызы удмурт кылын вераськыны мылкыд карись анай-атайёслы юрттэт сётӥсь туала центръёс ӧвӧл. «Аныкай» центрамы фольклоръя, калык киужъя, туспуктэм но видео лэсьтонъя мастер-классъёс, пӧртэм пумо лекциос ортчытъясалмы.
Но егитъёс шугъяськонэн пумиськизы — центрез усьтон понна тупась интызы ӧвӧл.
— Дэмласько проекттэс быдэс элькунамы вӧлмытыны, — вераз Александр Бречалов, — дышетон семинаръёсын ёросъёсы потаны яра. Малпасько, бордады итӥськыны трос мылкыд карисьёс луозы шуыса. Нош Ижкарын инты шедьтыны ми тӥледлы юрттомы.