Крезь гур чузъяськиз Ижкарысь Йӧскалык музейын

«Праздник крезя» концертын вашкала инструментлэн Удмуртиын улӟон но азинскон сюресъёсыз сярысь тодэм сяна, зэмос крезь гурез кылзыны луиз. Пусйымон Ижкарысь 57-тӥ школаын дышетскись нылъёс. Соос пӧртэм быгатонлыкъёссэс возьматыны дась: удмурт но мадьяр кылъёсты дышето, кырӟанъя но эктонъя кружокъёсы ветло, 2-тӥ арзэ «Шунды» ансамбльын крезен шудо.

Котькудӥз школа крезен шудӥсьёсын данъяськыны уз быгаты. «Нырысь ик, ӧнерчиос уг тырмо, — шуэ крезьчи Вероника Фёдорова. – Кыкетӥез, директоръёслэн инструмент басьтэмзы уг поты, малы ке шуоно, солы коньдон кулэ. Собере шуо: инструмент басьтӥм ке, оскыны уг луы, нылпиос дышетскозы шуыса».

Туннэ вашкала крезьгуо инструментэн тунсыкъяськисьёс ӧжыт ӧвӧл. Пӧлазы пӧртэм удысэз азинтӥсьёс, егитъёс но мойыос. Ужрадэз но учкыны пӧртэм выжы калыкысь адямиос вуизы. 

Тодосчиослэн чакламзыя, котькуд крезьгуро инструмент адямилэсь тазалыксэ юнматэ. Фортепиано — пекляез йӧнатэ, орган — малпаськыны юрттэ, нош крезь — сюлэм но вирсэр сӧзнэтэз юнматэ.