Котырес ӝӧк сьӧрын пумиськон ортчиз Алнашын

Отчы пыриськизы гурт поселениослэн тӧрооссы, йӧскалык огазеяськонъёслэн кивалтӥсьёссы но азьветлӥсьёссы, клубъёсын, лыдӟиськонниосын ужасьёс, школаосысь воспитательной ужъя педагогъёс, шаертодосчиос, ёросысь ветеран огазеяськонъёслэн кивалтӥсьёссы, егитъёс, Асанысь Совхоз-техникумысь студентъёс.

Котырес ӝӧк сьӧрын люкаськемъёслы дышетонэз азинтонъя Институтысь этнокультурной дышетонъя Центрлэн директорез Рустам Касимов «Этнокультурная компетентность: структура, части, элементы" темая лекция лыдӟиз. Со вераз Удмуртиын но Россиын этнокультурной политикалэн валтӥсь ужпумъёсыз сярысь.

Ужрад улсын Алнаш ёрос Администрациысь лулчеберетъя управленилэн кивалтӥсез Наталья Антонова «Мероприятия в сфере Государственной национальной политики, проведенные в Алнашском районе в 2016 году» темая видеопрезентация ортчытӥз. Со пусйиз: «Ёросысь йӧскалык огазеяськонъёслэсь ужзэс лыдӟиськонниосын но клубъёсын пуктыны кулэ. Нош ӟуч культурая «Надежда» Центрлэсь ужзэ рос-прос радъяно, малы ке шуоно Центр «Ремесленный квартал» нимо турпроектлэн валтӥсь люкетэз луэ».

Огвакытэ ёрос библиотекаын егитъёс ужазы. Ижкарысь Калыкъёслэн Эшъяськон юртысьтызы ӧнерчиос соосты проектъёс бордын ужаны дышетӥзы. Со сяна тодматӥзы егитъёслэн элькун но федерал форумъёслэн ужаменызы. Йӧскалык кусыпъёсты ӟеч радъянъя проект кылдытонлы сӥземын вал нимысьтыз занятие.