Котькуд пиналлы — шудон

Кузебай Герд, черно-белое фото

Педагогика наукаосъя кандидатлэн Валентина Ившиналэн докладэз, «Герд лыдӟонъёс-2019»

Котькуд тодосчи, Кузебай Гердлэсь пӧртэм удысъёсын тыршемзэ эскерыкуз, одно ик висъя солэсь дышетӥсь луэмзэ. Зэмзэ но, дышетонын со туж бадӟым пытьы кельтӥз.

Быгатонлыкез ӟеч, сямыз лякыт

Тодон-валанъёсын оскымон инъет Кузебай Гердлы, кызьы тодмо, нырысь ик сётӥз Кукаркаысь (али Киров улосысь Советск город) учительской семинария. Йылпумъяз сое вань предметъёсъя, математикаен но старославянской кылэн сяна, «5» басьтыса. Педсовет солы таӵе дунъет сётэ: «Чайниковлэн дышетскыны быгатонлыкез туж ӟеч, сямыз лякыт. Ужан мылкыдыз но ужазинлыкез туж вылӥын. Солэсь пӧрмоз умой дышетӥсь. Педсоветлэн малпамезъя, Кузьма Чайников двухклассной школалэн кивалтӥсез (заведующиез) луыны быгатоз».

Озьы ик луиз: 2 ар ӵоже (1916-тӥ-1918-тӥ аръёсы) Кузебай Герд ужаз туала Можга ёросысь Учаысь 2 классъем школаын дышетӥсь но кивалтӥсь луыса. Со бӧрсьы (1918-тӥ — 1920-тӥ аръёсы) тодон-валанъёссэ узырмытӥз, ужан амалъёссэ азинтӥз Малмыжын — дышетонъя уездысь отделлэн удмурт ёзаз инспектор но кивалтӥсь луыса тыршиз. Уно школаосы вуылӥз, пыр-поч тодматскиз удмурт нылпиосты дышетон югдурен. Трос пумиськылӥз дышетӥсьёсын, соослы тунсыко лекциос но докладъёс лыдӟылӥз. Та вакытэ ик Мултанэ педтехникум но усьтыны юрттӥз. Озьыен, та ортчем аръёс солы туж пайдаё луизы кивалтон опыт люкан ласянь но, дышетон амалъёссэ уноятон ласянь но.

Анай кыл

1921-тӥ арын, удмурт автономия кылдэм бере, Трофим Кузьмич Борисов Кузебай Гердэз Ижкаре ӧте. К. Гердлы оско туж бадӟым удысэз – областьысь калыкез дышетонъя отделысь (ОБЛОНО) дошкольной ёзэн кивалтыны. Вераны кулэ, та удыс чылкак выль вал ай. Соин ик ваньзэ нырысь эскероно, утчано но радъяно луылӥз. Кузебай Герд бордын вылӥллям инструкторъёс, секретарь. Кылдытэмын вылэм коллегия, бюро. Кузебай Герд ачиз ик коллегилэн тӧроез вылэм.

Ватсаны кулэ на, асьме шаермылы но, быдэс Поволжьелы но та вакытэ туж секыт вал. Граждан ож бере ваньмыз куашкамын, совето власть соку-соку гинэ нырысь вамышъёссэ лэсьтыны турттэ, аляло тиф, холера, трахома но мукет висёнъёс. Трос калык сютэм улыса быре.

Кузебай Гердэз уката сюлмаськыто сютэм улӥсь, начар семьяосын будӥсь удмурт пиналъёс, анай-атайёстэк кылем нылпиос, беспризорникъёс. Но тужгес но секытэз вал, кызьы пусйылӥз ачиз К. Герд, кадръёслэн тырмымтэзы.

Ужпум пуктэмын вал: нылпи юртъёс усьтэмен валче ӝегатскытэк дасяны кутсконо специалистъёсты. Одӥгаз коллегиын шуизы: котькуд уездын усьтоно нылпи садын, детдомын ужасьёсты дасянъя одӥг аръем курсъёс. Нош Глазовын огъя российской курсъёс мед луозы — ӧтёно Удмурт областьлэн палэназ улӥсь удмуртъёсты. Со дыре ик ОБЛОНО-ын но Кузебай Герд радъяз 2 толэзьем курсъёс. Со сяна, отын ик усьтӥськизы пӧртэм-пӧртэм кружокъёс — чебер лыдӟиськон, театр, киужъёс но мукет. Герд ачиз туж трос лыдӟиз лекциос, потаз пӧртэм курсъёсы, покчиосын ужан амалъёсын тодматонъя турлы занятиос ортчытъяз.

1921-тӥ арын ноябре Москваын ортче дошкольной ужпумъёсъя 2-тӥ всероссийской съезд. Удмурт шаерысь делегатъёс пӧлын вал Кузебай Герд но. Туж лэчытэсь ужпумъёс пуктӥзы покчиосты школалэсь азьло визьноданэз радъян пумысен.

Та съездлэсь решениоссэ улонэ пыӵатон понна Кузебай Герд быдэс ОБЛОНО-ен туж трос ужрадъёс ортчытӥз. Туж ӟырдыт вераськиз та арын ик декабре ортчем удмурт дышетӥсьёслэн 2-тӥ всероссийской съездазы. Валтӥсь малпанэз — удмурт пиналэз дышетыку, солэсь психологизэ мур валано, сое гажано. Со понна визьнодан ужез радъяно удмурт кылын, малы ке шуоно нылпи анай кылыныз малпаське но вераське. Удмурт пиналъёсты мед дышетысалзы удмурт кылэз тодӥсь-вераськись адямиос. Со сяна, педтехникумъёсын усьтоно дошкольной отделениос. Котькуд педтехникум борды юнматоно удмурт нылпи садъёсты, юртъёсты, соосты опытной площадка чот карыса.

Нылпи юртъёс

Кузебай Герд Ижкарын 2 нылпи юрт усьтэ. Одӥгез — ӟуч пиналъёслы, Троицкой (али Советской) урамын, нош мукетыз — удмурт пиналъёслы, Церковной (али В. Сивков) урамын.

Советской урамысез нылпи юрт усьтэмын вал 1898-тӥ арын, нырысь со Никольской черк бордысь приют шуыса нимаськиз, нош 1902-тӥ арысен — «Ольгинский детский приют трудолюбия». Ольгинской приютъёс эксэй Россиын данак вал, соосты озьы нималлязы, Николай II эксэйлэсь Ольга нылзэ данъяса. Та юрт али ке но сылэ, со чебер тупатъямын, отчы интыяськемын Ижкарысь Первомай ёросысь пиналъёслы ватсаса тодон-валан сётонъя центр. Со архитектурной синпелет луэ.

Удмурт детдомлы Кузебай Герд Максим Прокопьевлэсь нимзэ сётӥз. Нылпи юртын со ачиз но улӥз. Улон сэрегез 1-тӥ этажын вал. Кивалтӥсь шедьтытозязы, та юртэн со ачиз ик кивалтӥз но. Кузпалыз Надежда Антоновна но татын ужаз. Бӧрысь со юрт улон коркалы пӧрмытэмын вал ини. 1980-тӥ-1990-тӥ аръёсы туж вуж вал ини. Али, жаляса верано, сэрттэмын ни.

М. Прокопьев нимо нылпи юртэ 47 удмурт пиналъёс интыямын вал — 3 аресысен 8 аресозь. Сютэм аръёсы детдомъёсыз возьыны туж секыт йӧтылӥз, соин ик соослы музъем висъяллязы. Отын, эсьма, ма но со бакча емыш будэтыны быгатылӥзы.

Кузебай Герд ачиз но, саесъёссэ пужалляса ик, музъем бордын тыршыны дыр шедьтылэм. Тодэ ваёнъёсты лыдӟыса, валаськод: туж быгатыса со кивалтэм нылпи юртэн. Мур гажало вылэм сое ӵош ужась эшъёсыз. Котьку но лачмыт, лякыт вазиськись, чылкыт дӥсен, йӧно, чебер тусо. Туж яратэ но жаля вылэм котькуд пиналэз. Нош пиналъёс ас атайзы борды кадь лякисько вылэм. Бакчаязы будэто вылэм кияр, помидор. Юрт котырзы но азбарзы яркытэсь сяськаосын чеберъямын луоз вылэм. Кызьы гожъяз тодмо тодосчи, гердовед Фома Ермаков, нылпи юртысь пиналъёсты син азяз пуктыса ик, вордӥськиз, дыр, К. Гердлэн тодмо «Сяськаос» кылбурез.

Городэтӥ — автомобилен

Мынам пусъеме потэ на гажано Кузебай Герд сярысь мукет тодэ ваёнэз. Туж тунсыко потӥз со мыным.

Удмуртиысь тодмо шаерчи Анатолий Новиков «Город» журналын (2015-тӥ ар, куарусён) гожтэм М. Прокопьев нимо нылпи юртын ужасьёс сярысь. Отын ужа вылэм нылпи врач Павел Сергеев. Бӧрысь со туж тодмо эмчи луиз: Ленин орденэн пусъемын, Россиысь но Удмуртиысь дано врач. Со вылэм ӟуч. Казаньысь университетэз йылпумъяса удмурт гуртъёсын земской врач луыса ужакуз, вольыт вераськыны дышем удмурт кылын. Туж яратэ вылэм театрез, ачиз но гожъяське вылэм. Кузебай Гердэн туж тупаса ужаллям.

Со ик верам К. Герд сярысь: котькуд шутэтскон нуналэ К. Герд пукыӵ ньӧл кадь дыртыса мыноз вал Сенное, кыӵе ке выль шудонъёс басьтыны. Шуэ, пе, вылэм: котькуд пиналлэн аслаз яратоно шудонэз мед луоз. Я пулэсь лэсьтэм семёновской, городецкой шудонъёс, куддыръя дымковской шуланъёс но мукет ас лэсьтэм арбериос Сенное вайыло вылэм Нижегородской губерниысь. К. Гердлэн мылкыдыз куашкаллям визез бергатыны-сынаны юрттӥсь чебересь шудонъёс ӧвӧлысь. Вот, шуэ вылэм, автомобилез но нылпиосы ӧз адӟылэ на, луысал ке огпол ке но соин ворттылытыны!

Ижкарын 1920-тӥ аръёсы чылкак одӥг гинэ «Форд» автомобиль вылэм, липеттэм машинаен Шадрин кузёлэн водителез калыкез ворттылытэм. Маршрутэз таӵе вылэм: Летний сад дорысен тубе Троицкой (Советской) ульчаетӥ, коже Бедноты (Коммунаров) ураме, ваське Вотской (Киров) пролкаетӥ но Базарной (Горький) ураметӥ выльысь вуэ Летний садозь. Павел Сергеев врачез, городын авторитетэз бадӟым бере, Кузебай Герд «Фордлэн» кузёеныз вераськыны косэм: оло, нылпи юртысь пиналъёсты ворттылытозы? Шадрин соглаш луэм. Со гинэ ӧвӧл ай, воштытэм сюрессэ но: пырак детдомысь басьтыса, пиналъёсты городэтӥ ворттылытэм!

Та пичи гинэ учыр вылын но адӟиськом, макем визьмо, адӟем карымон, кужмо но йӧно вылэм удмурт калыклэн Кузебай Герд пиез. Историысь тодӥськом: ОБЛОНО-ын но нылпи юртын ужамез бере Кузебай Герд кошке Москвае Литературной институтэ дышетскыны.

Оцените статью
Дом Дружбы народов
Добавить комментарий