Короленко нимо театр интыын удмурт лулчеберетъя центр кылдоз

    Короленко нимо театр интыын удмурт лулчеберетъя центр кылдоз 1

    Чакламъя, выль центрлэн юртэз азьвыл театрлэнэз сярысь ог кык поллы бадӟымгес луоз.

    «Матысь арняосы вуттэмын луоз проект. Со ӵектосэз ми нуиськом Москвае, кайта арлы кыӵе ке коньдонэн юрттэт курон вылысь. Юртэз кесям бере, туэ ик отчы фундамент кисьтозы», — шуиз лулчеберетъя элькун министр Владимир Соловьёв.

    Тодады вайтом, ӟуч театрлэн юртэз 72 ар талэсь азьло ӝутэмын. Сое кӧня ке ар талэсь азьло трос пумо куронъёслы тупамтэеныз ворсазы. Али лэсьтэм экспертиза но возьматӥз — юрт куашка, сое выльдыны луонлыкъёс ӧвӧл.

    Лэсьтӥськонъя но ЖКХ-я элькун министрлэн Дмитрий Сурнинлэн верамезъя, со интыын 2 этажъем туала юрт пуксёз. Кунлык басьтэм дырысен 100 арез пусъёнлы, нош со вуоно арын шуркынмонэ луоз, ужъёсты йылпумъяны кулэ.

    Выль юрт удмурт шӧмо луоз. Огъя дуныз 450 миллион манет пала. 80%-эз уксё федерал центрысь вуоз.

    Лулчеберетъя центре, ӟуч театрлэн вуж юртаз сямен ик, интыяськоз калык кырӟанъя но эктонъя «Айкай» театр, озьы ик центрын ужалоз «Удмурт Кенеш» огазеяськон, нимысьтыз чакламын луозы выставкаос, конференциос но мукет ужрадъёс ортчытъян вылысь залъёс, нылпиослы студия.