Кизнер ёросысь егитъёс «ЭТНОэксперт» визьбурлыко шудонын вормизы Удмуртиын

Пӧртэм калыкъёслэн улонзы, лулчеберетсы но сям-йылолъёссы сярысь юанъёслы тужгес трос шонер валэктонъёс Кизнер ёросысь «Имперская гвардия» команда сётӥз.

Кизнер ёросысь егитъёс финалын 1920 балл люказы но вормисе потӥзы. Кыкетӥ инты Каракулино ёросысь «Не такие как кажемся» команда басьтӥз (1390 балл). Можгаысь егитъёслэн «Восьмёрка» командазы куинетӥ луиз (1230 балл).

Ватсалом, йылпумъясь шудонэ быръён люкетэз ортчем командаос пыриськизы.

Тодэ вайытом, «ЭТНОэксперт» Удмуртиын 2014-тӥ арысен ортче. Визьбурлыко шудонэз элькунысь Егитъёслэн йӧскалык лулчеберетъя огазеяськонъёслэн ассоциацизы радъя.