Кизнер ёросын ортчиз «Ӝужась кизилиос» лагерь

    Кизнер ёросын ортчиз «ӝужась кизилиос» лагерь 1

    Котькуд ёросысь удмурт азьветлӥсьёслэн потэ, дыр, «Шундыкар» выллем удмурт лагерь соос дорын но мед радъяськоз шуыса. «Шунды» огазеяськонысь егитъёс шуо: ваньмыз потэ тӥ бордысь. Тани Кизнер ёросысь Вуж Бӧдья школаысь директорлэн воштӥсез Елена Маркова кутӥз но гожтӥз удмурт лагерья программа, вазиськиз шаерысьтымы Дышетонъя но наукая министерствое. Отын та малпанэз умоен лыдъязы но коньдон висъязы. Но тодыны кулэ, ужрадды гужемлы чакламын ке, министерствое сӥзьыл ик вазиськоно — бумага ужъёс трос дырез быдто.

    — Удмурт лагерь ёросамы радъяны кемалась малпаськомы вал ни. Ми Ижлэсь кыдёкын улӥськом, «Шундыкаре» пиналъёсмы уг сюрыло, — вера Елена Маркова. — Та сюлмаськонъёс бордысен ик вордӥськиз лагерьмы. Малпамы: татын ми нылпиосты «Шундыкар» лагере но дасяломы.

    Озьы пӧсьтолэзе Кизнер ёросысь Безменшур школае люкаськылӥзы Кизнер, Можга, Алнаш ёросъёсысь 40 пиналъёс. Шудонъёс, ӵошатсконъёс, тунсыко адямиосын пумиськонъёс сяна, татын котькуд нуналэ ужазы пӧртэм кружокъёс. 4-тӥ пӧсьтолэзе пиналъёс дышетскизы газет-журналъёсы ивор дасяны но театрын шудыны, мукет нуналаз — киужен выризы, берпуметӥяз — пиналъёслы веразы, мар улонын тужгес зол азинске, кыӵе удысъёсын удмуртъёс асьсэзыс возьматыны быгато.   Та кружокъёсты нуозы Удмурт театрысь артистъёс, «Удмурт дунне» газетысь журналист Мария Векшина, Россиысь Правительство бордын ужась Координационной кенешысь Камил Габдуллин.  Нуналлы быдэ азьветлӥсь сямзэс сайкатыны выриз Эшъяськон юртысь ужась Ольга Тронина. Оглом вераса, нуналъёс туж пайдаё но узыр ортчизы.

    — Лагерьмы сярысь иворез школаосы лэзьямы, кинлэн потэ вал, соос вазиськизы, троссэ ӧм басьтэ: инты ӧй вал ни, — вера Елена Маркова. — Вуоно арын тамында ик куриськисьёс луизы ке, конкурс ортчытом. Ми таӵе лагерез туэ нырысьсэ радъяськом бере, курдаськом ай: кызьы ваньмыз ортчоз?!

    Лагерь пӧрмиз, пиналъёслы кельшиз, соос куро ни Кизнер ёросысь «Ӝужась кизилиос» лагерь вуоно арын но дышетскисьёсты мед пумиталоз шуыса. Оскиськом, со йылоллы пӧрмоз шуыса.

    * * *

    Та выллем удмурт лагерьёс ёросъёсын арысь аре тросгес мед луозы вылэм. Егитъёслэн «Шунды» огазеяськонзы ялан вералля: таӵе луонлык котькуд ёросын вань, со понна, программа малпаса, ёрос администрацие гинэ вазиськоно. Огазеяськонысь егитъёс асьсэос но дась юрттӥськыны. Озьы удмурт лагерь трос аръёссэ ни ужа Алнаш ёросын, Можгалан, кылем арын тазьы шутэтскизы Кияса ёросысь удмурт пиналъёс.

    Мария Иванова

     By Удмурт Дунне