Киясаысь Нина Угланова «Русь мастеровая» огъяросси вожвылъяськонын нырысетӥ инты басьтӥз
Ужрад 15-17 шуркынмонэ ортчиз. Россилэн уйпал шоркараз кунлэн 38 улосвылъёсысьтыз 90 ужусточиос вуизы. Вожвылъяськон 10 ӧръёсъя мынӥз. Пыриськисьёс одӥг нунал ӵоже ялэм темая киуж лэсьтыны кулэ вал.
«Мон конкурсэ «Инкуазь материалъёслэсь пунӥськон» номинацие пыриськи. Темазэ азьвыл ик ум тодӥське вал, сое 14 числое ӝытазе гинэ веразы. <…> Мон кыкетӥ нуналаз, 16 числое, ужай, темаез вал «Моё родное». Мон аслэсьтым семьяме возьматыны тырши, малы ке шуоно темаез туж паськыт валаны луэ – со мынам шаере но, мукетыз со выллем но. Куролэсь куинь мунё лэсьтӥ – асме но нылпиосме», — вера Киясаысь Киужъёсъя юртысь ӧнерчи Нина Угланова.
Нина Углановалэн верамезъя, таӵе бадӟым ужрадын со нырысьсэ вылӥ данъет басьтӥз. Нялтас вераса, солэсь киужъёссэ вожвылъяськонэ лыктэм куноос но дунъяллям.
«Латвиысь вал, соослы ужъёсы кельшизы, доразы ӧтизы, ӧтён лэзем шуизы. Соослэн отын куроя калыккуспо фестиваль луоз. Потэ (мынэме – ред.), адӟом. Гужем луоз», — шуэ Нина Угланова.
Кияса ёросысь кибашлыослэн юртазы Нина Угланова вить ар талэсь азьло вуэм, соку ик солы выль ӧр – куроен ужан — ӵектӥллям. Озьы ик со гынэн выре. Пиналъёслы но бадӟымъёслы мастер-классъёс ортчытъя.
Ватсалом, «Русь мастеровая» вожвылъяськонэ Удмуртиысь эшшо одӥг кибашлы ветлӥз – Балезино ёросысь Карсовай черкогуртысь Ольга Трефилова. Со пыриськисьлэсь дипломзэ басьтӥз.
Тодэ вайытом, 24-тӥ шуркынмонэ Можга карысь «Октябрь» лулчеберет юртын «Удмуртия мастеровая» кыкетӥ усьтэм ёроскуспо вожвылъяськон-адӟытон ортчоз.