Кияса ёросысь Удмурт ёлкае удмурт, ӟуч, пор но бигер Тол Бабайёс вуылӥзы
Выжыкылысь геройёслы бадӟым классъёсын дышетскись пиналъёс пӧрмизы, вераз Кияса ёросысь егитъёсын ужанъя ёзэтэн кивалтӥсь Ольга Танаева.
Со верамъя, ӟуч пиналъёс та удмурт ужрадэ нырысьсэ пыриськизы. Сое Киясаысь школаын фольклоръя кружок кылдэмен герӟаны луэ, лыдъя Ольга Танаева.
«Милям кружок нырысетӥзэ ужаны кутскиз Кияса школаын, фольклор кружок. Митриянова Любовь Алексеевна нуэ. Соин но, дыр, копак ӟуч пиналъёс удмурт кырӟан кырӟаны кутскизы. Соин, малпасько, та Выль ар ужрадэ пыриськизы, туж ӟеч пыриськизы», — вераз егитъёсын ужась ӧнерчи.
Солэн чакламезъя, ёросын удмуртлыкъя уж арлыдоос пӧлын юнгес радъяське, пиналъёслы анай лулчеберетэз пыӵатон лябгес пуктэмын. Соин ик нылпиос ужрадъёсын ке но удмурт кылын верасько, кырӟало но удмурт эктонъёсты экто ке, со туж умой лыдъяське ни, шуэ егитъёсын ужанъя ёзэтлэн кивалтӥсез. Одӥгез сыӵе ужрадъёс пӧлысь — Юрмалай гуртын ортчись удмурт фольклоръя «Яратоно шаере» нылпи фестиваль.
«Туж вылӥ уровенез ӧй вал, дыр, но удмурт сямен вераськимы, удмурт сямен кырӟам-этӥм. Соиз но умой милям ёрос понна, малы ке шуоно тросгес милям Кияса ёросын удмуртлыкъя уж мынэ арлыдоосынгес. Пиналъёслы ӧжытгес, кадь, саклык висъяське, костюмъёс но, мар но ӧвӧл», — шуиз Ольга Танаева.